Gobierno di Aruba a pone e bienestar di carnavalista, cultura y economia como prioridad na momento cu diaranson merdia a dicidi pa otorga e permiso pa organisa Carnaval 2015 na e fundacion nobo SMAC. Intermediacionnan haci durante ultimo simannan no a duna ningun avance positivo den e posicion di SAC y Stichting Gruponan di Carnaval. Manera Prome Minister Mike Eman a bisa: “Esey kier men cu un cantidad hopi grandi di grupo lo a keda sin participa y esey ta haci un daño hopi grandi na Carnaval di Aruba.”

Despues di a ricibi un carta for di Stichting Gruponan di Carnaval dia 20 di october ultimo splicando e factornan di tempo cortico pa por prepara nan grupo, Gobierno a aumenta su esfuersonan pa yega na un solucion. E posicion di e gruponan di Carnaval “lo nifica inicio di fin di Carnaval di Aruba,” segun Premier Eman pasobra e cantidad di grupo ta prominente no solo den cantidad, pero reconoci tambe den calidad.

Ainda den transcurso di ayera a haci un esfuerso mas prome cu tuma un decision. Gobierno a pidi Cuerpo Policial Aruba pa reuni cu SAC y splica nan di e situacion. SAC di su banda, no a cambia di opinion y a menasa di hiba Gobierno Corte si duna e permiso na SMAC. Loke Gabinete Mike Eman II a tuma nota di e carta, ta cu nan ningun momento SAC ta mustra disponibilidad pa sinta y yega na un solucion.

“Un permiso otorga na SAC ta nifica cu un grupo grandi di nos comunidad no lo participa. Nos tin motibo pa pensa cu hopi di nan participantenan no lo participa y esey lo ta un sla hopi grandi pa Carnaval,” Minister President Eman a bisa. Pesey a invita e gruponan y puntra nan bou di cua condicion nan por participa. Stichting Gruponan di Carnaval a bisa cu en todo caso no bou di SAC.

Gobierno ta bay invita SMAC pa un reunion awe pa splica nan bou di cual condicion Gobierno ta duna nan e permiso. Gobierno kier mira un organisacion caminda tin participacion y transparencia caminda Carnaval ta wordo organisa. Statutonan nobo mester wordo traha pa refleha e deseo di gobierno y deseo di gruponan pa democracia prevalece den e forma con ta organisa Carnaval.

Prome Minister a sali cu solamente sentimentonan positivo pa tur partido envolvi. Reconocemento pa e gruponan di Carnaval cu a bay di acuerdo pa participa pa e bon di Carnaval di pais Aruba y ningun rencor ni mal sentimento pa cu SAC, recordando con tur aña cu a haci entrega di mando y cu admiracion pa tur e miembronan di SAC cu pa hopi aña a duna di nan parti. “Simplemente un situacion aworaki cu ta mustra cu bou di e condicionnan no lo por ta posibel pa SAC organisa un Carnaval cu participacion di tur e gruponan manera ta haci Carnaval di Aruba uno grandi,” Premier Eman a bisa.

“Awe mi ta kere cu nos por a saca un conclusion y un solucion cu ta esun mas miho bou di e circunstancianan aki. Nos lo sostene e gruponan manera cu nos a sostene SAC semper y lo sostene SMAC pa haci di Carnaval 2015 un exito grandi a pesar di e tempo cortico cu nos tin pa bay,” tabata e palabranan final di Prome Minister Mike Eman na salida di e reunion.

Expresionnan haci den e articulo aki no necesariamente ta refleha opinion di ArenaPoliti.co