Gabinete Mike Eman II ta introduci un Traimerdia pa studiantenan di scolnan secundario. Esey ta nifica cu den oranan despues di scol nan por sigui diferente programa caminda nan por desaroya nan creatividad y talento mas leu. E Traimerdia ta un iniciativa di e Ministerio di Asunto General, Ciencia, Innovacion y Desaroyo Sostenibel hunto cu e Ministerio di Enseñansa y Famia. EPB Pariba ta realisa e lansamento dia 3 di november, mientras cu e cantidad ta wordo expande. E preparacionnan pa e inicio na tres scol miembro di Stichting Katholiek Onderwijs Aruba (SKOA) ta progresando positivamente. E parti di e programa ta consisti di un serie di workshop riba video, pa studiantenan di ciclo basico di scolnan secundario.

E workshopnan di cine, titula Camkidz, ta un iniciativa di Stichting WeConnect, funda dor di Tanja Fraai y Mike Ho-Sam-Sooi. E productornan aki di Hulanda a yega di presenta e workshop aki anteriormente na diferente scol di Corsou cu hopi exito. Segun docente Tanja Fraai: “Nos a keda impresiona cu e creatividad di e studiantenan; den un siman nan a filma nan mesun storianan cu e camaranan chikito cu nos a duna nan.” E tema di e peliculanan tabata varia; amistad, termento, malesa y te hasta e donacion di curason di mama pa yiu a bin dilanti. “E muchanan a scoge loke nan ta wak den nan medio ambiente.”, asina Tanja Fraai a indica.

Formacion Sostenibel
E idea tras di e workshops ta pa laga e hobennan experiencia con nan por desaroya  nan talentonan. Nan ta siña den un par di stap con den un grupo por skirbi un script simpel, con ta conta esey pa medio di escenanan, con ta graba e escenanan ey, con ta edita e material y por ultimo, presenta nan pelicula na un publico den sala. E camaranan ta keda pa e scolnan despues. “Asina e proceso di estudio por avansa y otro klasnan tambe por probecha di esaki. Esey ta combina bon cu e esfuersonan di sostenibilidad di e comunidad Arubiano ”, segun Fraai. Mas ainda e guianan di e traimerdia tambe ta wordo prepara y entrena. Ta gradici e sosten ricibi di parti di patrocinadonan manera TNO, Divi Resorts y Coca Cola. “Sin e companianan aki no lo tabata posibel pa duna e workshop.”

Proyecto Piloto
Bart Kool, coordinador di e proyecto Traimerdia Scolnan Secundario, ta contento cu e workshopnan di cine:  “Despues di un par di luna di preparacion caminda nos a haya hopi cooperacion y aprecio di tur hende, nos kier cuminsa haci algo unico na EPB Pariba. Un proyecto interesante cu e hubentud por gusta. Nos ta kere cu e programa di Stichting WeConnect por ta esun ey.” 

Mas aleu Kool a splica cu e proyecto ta bay cuminsa cerca cuater pa cinco scol den su prome aña. Por ehempel, e Stichting Katholiek Onderwijs Aruba proximamente lo bin acerca cu tres scol. E studiantenan di klas un y dos lo ta esnan prome na beurt: “Esaki ta un grupo mas pareu cu esnan den klasnan mas avansa, kier men mas facil pa cuminsa cune den e fase piloto aki.”, e coordinador a splica. 

Stichting WeConnect
Stichting WeConnect ta un iniciativa di e productonan Tanja Fraai y Mike Ho-Sam-Sooi.
E fundacion a lanta na final di 2013 na Amsterdam y tin como meta pa conecta e culturanan den Reino pa medio di e desaroyo y ehecucion di proyectonan educativo. E docentenan lo ta riba nos isla entre 31 di october y 16 di november. Pa mas informacion, bishita www.stichtingweconnect.nl.

Expresionnan haci den e articulo aki no necesariamente ta refleha opinion di ArenaPoliti.co