Manera Prome Minister Mike Eman a anuncia diaranson ultimo, a yama un reunion cu miembronan di SMAC. Esaki a tuma luga diabierna merdia den sala di Conseho di Minister. E reunion ta relaciona cu e decision di Gabinete Mike Eman II pa otorga na e fundacion aki e permiso di organisacion di Carnaval pa temporada 2015. Minister President Eman a indica cu ta haci esey bou di cierto condicion pa medio di cual Gobierno di Aruba ta sigura cu e situacion cu a hiba na gruponan di Carnaval perde confianza den SAC, no mester ripiti cu ‘Stichting Maneho pa Aruba su Carnaval’ (SMAC).

Manera ta conoci, e fundacion SMAC ta consisti di diferente sector y gremionan den nos comunidad cu ta enfoka riba organisacion, maneho, promocion y produccion di Carnaval. Ta trata aki di por ehempel, Cuerpo Policial, musico, departamento di cultura, comercio, oficina di turismo y gruponan di Carnaval. Nan a sinta cu Prome Minister Mike Eman pa tende cua ta e posicion y deseo di Pais Aruba den e asunto. Ta busca pa garantisa cu tur partido envolvi tin garantia di participacion y bos den e produccion di tur evento relaciona cu Carnaval y un transparencia den e maneho di esaki.

No a duna detaye di kico exactamente a wordo discuti, pero a confirma cu e reunion a bay den un bon ambiente. Esaki ta e prome paso cu lo hiba na e oficialisacion di SMAC como e entidad encarga cu organisacion di Carnaval 61. Gabinete Mike Eman II a tuma e decision aki pa salbaguardia e fiesta cultural di mas grandi riba nos isla y teniendo cuenta cu su efectonan economico y social.

Expresionnan haci den e articulo aki no necesariamente ta refleha opinion di ArenaPoliti.co