UPP for di varios aña atras a bin ta denuncia diferente actonan inapropia cu ta tumando lugar den e sector di Salubridad Publico, y ta lamentable pa mester constata cu no solamente e partido na mando ta keda keto, pero ta parce cu tur otro organisacionnan y instancianan a dicidi di sera un pacto pa mantene un silencio hermetico riba tur e asuntonan aki.

Nos a denuncia na hopi ocasion e corupcion masal den henter e asunto di e proyecto di Renobacion/Expansion di HOH. Nos a hasta reta e minister concerni pa menciona nomber di esnan cu e continuamente ta acusa di ta culpable di e bochorno di e salanan di operacion, pero manera un cobarde ta scohe pa keda keto.
Nos a pidi documentonan relaciona cu e proyecto di HOH, cu e mesun minister aki a priminti cu boca grandi, cu ken cu kier lo por bay SOGA pa pidi "inzage" den TUR documentonan, y te cu awe nada.
SOGA cu aparentemente ta consisti di hendenan "drechi", a para bira un set di coruptonan cu ta maniobra hunto cu e ministernan Eman, Zievinger, Schwengle y e ex-minister Visser. Nan a y ta permiti pa e grupo mafioso di Miami sigui cu nan corupcionnan y manipulacionnan.

Te awe nos ta sperando e resultado di e "feitenonderzoek" cu parlamento a exigi di e minister. Un biaha mas parlamento ta fayando di no exigi di e minister pa bin duna cuenta. Of acaso tin "feiten" a bin dilanti cu ta incrimina varios minister cu e fraccion di AVP no tin e curashi di atende cu nan?
Alabes nos a denuncia y duna "aangifte" di posibel actonan inapropia di varios mediconan aki na Aruba, y ainda Ministerio Publico no a bin afo y bisa kiko lo bay pasa. Of acaso tin Husticia di Clase aki na Aruba?
Ta straño cu no tin ningun reaccion di e mundo politico al respecto. Of esnan involvi ta cerca di e partidonan politico? Nos ta papia cu tin hopi criminalidad aki na Aruba, y partidonan cu razon ta papia riba esakinan, sinembargo riba tipo di actonan asina ta keda keto, dicon??
Cada florin cu wordo horta, of fraude wordo cometi cu AZV, ta bay a costo di e salud di nos pueblo, esaki no ta importante pa nos politiconan??

Tin un silencio hermetico tambe entorno e asunto di "openhartoperatie" cu ciruhanonan di Maastricht a haci na Aruba. Dicon Maastricht a bula afo? Ta berdad cu tin un cardiologo Arubano hunto cu algun hefenan di departamento den HOH ta involvi den e negoshi di "pacemakers" y otro material? Y awor diripiente no ta bay sigui cu Maastricht pero cu Amsterdam? Pero esaki no pa "openhartoperatie", pero pa cateterizacion so y pacemakers, pasobra eynan e cardiologo cu su compinchinan por sigui cu nan negoshi paga via Cayman-Islands.
Dicon e directornan di HOH no ta bin dilanti y papia cla? Dicon sr. Kan no ta bin bisa kiko e sa? Dicon sr. Ringeling no ta bisa dicon Maastricht a bula afo? No ta e mes a bisa cu e ta super contento?

Kedando keto boso ta bira complice den e privamento di un cuido medico specialisa y di calidad pa nos pueblo.
Despues cu den segundo mitar di 2009 varios cateterizacion a tuma lugar na IMSAN, desde november 2009, nada pero nada mas a sosode na IMSAN, al contrario. Dia pa dia e situacion ta birando mas alarmante. Aparatonan sofistica ta para putrid, y ya nos tin 6 aña ta tende mesun storia di Oncologia, sinembargo te awe nada nada. Pakiko? Pasobra no tin placa. Pero sí tin placa pa biahamento pa loco, pa coordinadornan, etc., etc.

A yega na nos conocemento cu ya caba e "huisartsenpost" tin solamente 1 huisarts enbez di 2 na IMSAN, y pronto e "wondenpoli" lo bay for di eynan pasobra e lugar ta pesta cu MRSA!!!
Con esaki por ta?? Un edificio nobo nobo. No tabata tin placa pa por a preveni esaki?
Aruba, ta te ki dia nos ta keda soporta cu no solamente ministernan, pero tambe otro hendenan y instancianan ta malogra nos pais y nos pueblo.
Aruba,QUO VADIS??!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 2, 2015

Expresionnan haci den e articulo aki no necesariamente ta refleha opinion di ArenaPoliti.co