E siman aki a habri cu e noticia cu e conferencia mundial riba clima COP21 na Paris a habri sin presencia di Minister Eman. Un noticia hilarico pa no bisa cu e ta ridiculo. E motibo ta cu Minister Eman ta conta mundo un storia bunita siendo cu en realidad esaki ta nada mas cu un farce berde.

Trabou di salesman pa Reino  
E vision di Minister Eman pa un Aruba 100% liber di uso di fuel oil na 2020 ta zona masha alentador. E realidad ta cu IMF y TNO a adverti nos caba cu ta te 40% nos Pais lo por yega haciendo uso di energia alternativo na un manera responsabel. Pero e storia aki aunke cu e ta un farce, ta zona bunita y ta net algo cu Reino por haci uso di dje den e campania pa logra yega na e stul temporario den e Conseho di Seguridad di Nacionnan Uni. Bou di e lema di desaroyo, Minister Eman ta haci e trabou di salesman pa Reino, contando e storia di Aruba 2020 na otro islanan chikito manera nos cu retonan grandi pa por ta sostenibel. E meta di esaki ta pa gana e confiansa di e asina yama Small Islands Developing States SIDS, pa nan confia Reino cu un voto. Pues e presencia di Minister Eman na e conferencia ta nada mas pa haci e trabou di salesmen bendiendo un farce.

No a haci nada pa sostenibilidad
Tristo ta cu Minister Eman ta bay rond mundo pa gaña cu na Aruba tin hopi adelanto riba e tereno di sostenibilidad siendo cu esaki no ta berdad. Nos no tin ni sikiera un dump drechi pa procesa sushi. Nos no nos tin ley pa proteha nos medio ambiente y e mesun Gabinete Eman aki ta duna permiso pa traha cas y haci proyecto den zona destina pa naturalesa. Sin papia mes di e hecho cu Aruba no tin ni sikiera un plan nacional pa recyclahe. Y mas tristo ta cu bou di e capa di ‘green’ Minister Eman a laga su hendenan comete e crimen di hedging na WEB perhudicando full nos Pais y limitando un gran parti di nos Pueblo di suministro di awa. En corto, Minister Eman no a haci nada pa sostenibilidad pa nos Pais y ta simplemente sinta gaña na Aruba y den exterior.

Enves di gaba cu farce por a goberna ‘green’ di berdad
Di un gobierno cu ta profila su mes como uno ‘green’ Pueblo por a spera mas cu solamente un storia bunita di sostenibilidad. Sikiera por a percura pa e ley di cuido di medio ambiente por a bira un realidad y no permiti cu naturalesa na nos Pais wordo kibra y maltrata manera nos por a presencia den e proyecto Green Corridor. Pero lamentablemente hasta riba e tereno ‘green’ Minister Eman a scohe pa gaña nos Pueblo y tambe esnan den exterior cu su storia bunita cu ta nada mas cu un farce berde.


2 december 2015

Expresionnan haci den e articulo aki no necesariamente ta refleha opinion di ArenaPoliti.co