Parlamento ta tratando un gran cantidad di leynan parew, pasobra gobierno a cai laat cu tur e leynan cu mester pasa ainda prome cu fin di anja. Esaki ta stroba e trabou di Parlamentarionan y pesey lider di MEP Evelyn Wever-Croes mester a para su bishitanan den pueblo y ayudo cu e ta duna. Pa por cumpli cu tur e fechanan pa prepara pa e leynan, Presidente di Parlamento semper ta anuncia e fecha ultimo of deadlines pa entrega pregunta. Un palabracion por escrito cu semper henter Parlamento a sa di respeta.

Pa por ehempel e ley di aumento di BBO y pa e cambionan den presupuesto 2014, e deadline a wordo stipula pa fin di dia di diaranson 19 di november. Esaki Presidente di Parlamento a manda por escrito na tur parlamentario.

Sinembargo, durante un reunion interno fraccion di AVP a cambia e palabracion aki, pasobra nan no tin ningun interes di hasi pregunta riba e leynan, y a dicidi cu ningun otro parlamentario por hasi esey tampoco.

Naturalmente fraccion di MEP no a acepta esaki y no a keda nada otro cu acudi na Gobernador pa entrega keho un biaha mas contra e falta di democracia den Parlamento.

Copia di e keho aki lo wordo manda pa Gobierno di Hulanda y parlamentarionan di Hulanda, pasobra mester pone un fin na e violacion di nos democracia. Tur instituto di estado a avisa Parlamento pa asumi su responsabilidad, pa no hunga e tipo di wega aki, pa tuma e trabou na serio, pasobra sino, otro ta bin hasi e trabou pa nos. Parlamentarionan di AVP no a sinja nada di esaki, y mas tristo ta cu Presidente di Parlamento ta hunga e wega cu nan. Presidente di Parlamento Marisol Lopez-Tromp a demostra cu e no ta hende di palabra, cu su palabra no tin ningun valides.

AVP a reacciona bisando cu fraccion di MEP no tabata den sala na e momento ey, y esey lider di MEP a confirma, debi cu un delegacion di e fraccion tabata den reunion na Banco Central y e otro parti di e fraccion tabata cumpli cu conferencia di prensa. Sinembargo asina cu nan a termina, a drenta sala, pero e ora ya e reunion a wordo termina. AVP ta conosi pa su ley di 6 minuut, y ta sigi hasi esaki ora nan kier hunga wega.

Ta keda increible con parlamentarionan di AVP ta scohe pa NO hasi pregunta den un ley asina importante, e ley cu a ocasiona e kiebro den credibilidad di AVP, cu a manda nan lider den un welga di hamber, e ley cu ta contene medidanan cruel contra pueblo, anto nan ta dicidi di no manda ningun pregunta? Parlamentarionan di AVP a demostra un biaha mas cu nan no ta serio den esaki.

Klik aki pa lesa e keho