Oranjestad: Na vispera di aña nobo, Parlamentario, sr. Guillfred Besaril, ta refleha riba algun sucedido impactante di e aña cu ta cabando y a conclui cu 2015 tabata un aña hopi duro tanto pa Aruba como pais como pa su ciudadanonan.

Criminalidad
"E fraccion di MEP den Parlamento na varios ocasion durante aña a vocifera su preocupacion relaciona cu actividadnan criminal cu a lanta cabes. Aruba a conoce un record enorme den atraco, robo y tiroteo den varios bario, hasta dos cu consecuencia fatal. Varios atraco grandi, robo y tiroteo den e area turistico y importante conoci como "High Rise Hotels". Tipo di suceso manera esakinan, a pone un luz sumamente negativo riba loke ta siguridad di pais Aruba. Mas ainda, a trece nos unico pilar economico - nos turismo - na peliger. Di otro banda e titular di Husticia ta pronkia cu cifranan di combatimento di criminalidad bisando cu cos na Aruba ta bon compara cu otro islanan den region. E manera di pensa, pues di compara appel cu peer, ta demostra e mandatario su falta di convivencia cu e Pueblo. Ademas e ta muestra cu e no a ni trata di compronde e sentido di insiguridad cu ta reina den comunidad.

Frontera
E realidad amargo ta, cu si no tabata asina facil pa drenta cu arma y otro articulonan ilegal den nos pais, awendia e minister en cuestion lo no ta papia di un “high season” di criminalidad. Ta di lamenta cu nada a wordo haci den e area specifico aki. Prevencion di Criminalidad a haña masha poco atencion. Y na momento di papia di prevencion no ta nifica solamente mas blauw riba caya, pero tambe prevencion na nos costanan pa evita cu e articulonan ilegal (droga, arma di candela, etc.) drenta Aruba. No tin un maneho fiho pa evita loke ta pasando! No tin definicion di tarea, no tin ordenansa (landsbesluit) regla den cual ta duna cierto ambtenaar e autoridad legal pa traha, no tin radar, no tin helicopter, no a bin cu mas polis nobo, no a busca un formula pa aumenta e vigilancia riba caya. Simplemente "Nada" cu realmente lo a trankilisa Pueblo. Si sikiera a regla un team special combina di expertonan di polis, Marina Rreal (Kustwacht), Warda nos Costa y CEA, lo por a haci nos frontera uno miho cuida y vigila. E hecho cu e criminalnan aki ta drenta nos pais, comete nan fechoria y tin acceso na armanan pisa ta prueba cu nos costanan ta sclama pa accion!

Aruparking
E forma desastroso con e Gobierno di AVP a introduci e ley di Parkeermeter, tabata un falta di respet enorme pa tanto Pueblo como comercio en general di Aruba! Comerciantenan di Caya Betico Croes y vecindario mester a soporta mas di 3 aña di perdida door di construccion den e caya principal di Oranjestad. Despues di e introduccion di e ley di Parkeermeter, mayoria comerciante a trece padilanti cu nan benta a bolbe cay cu un promedio di entre 30 pa 60%! Ademas cu e ley aki a wordo introduci con cu ta, e problema di mas grandi ta e implementacion y control di e ley. A lanta un NV, train algun persona pa algun siman y pone nan encarga cu e implementacion y control di parkeer den centro di ciudad. Tur esaki sin cu nan tin un conocemento adecuado di ley y pa completa e asunto, ta paga nan entre 800 pa 900 florin mas pa luna cu e salario promedio cu un agente policial cu a atende scol di polis ta gana! Aki a conclui cu ora ken cu ta, haci ki cu ta, bo ta haya un cos cu ta con cu ta!

Belasting
Na April di 2015, gobierno Mike Eman II a introduci e asina yama “Exchange Rate Margin Compensation”, esta un belasting riba cambio di divisa. Banda di e hecho cu e belasting aki tabata un peso adicional pa comercio, e ta un carga administrativo pisa pa e institucionnan bancario. Segun gobierno, nan mester a introduci e belasting aki, ya cu e gastonan operacional di Banco Central a subi, pero di otro banda a saca 17 miyon na dividendo di Banco Central. E forma den cual e ley aki a pasa a cay tur gremio di sorpresa y tabata manera un baño di awa friu. (Peor que famoso Ice-Bucket-Challange!) Durante aña 2015 gobierno di Mike Eman tambe tabata a punto di tuma un decision pa loke ta e introduccion di un belasting nobo entrante januari 2016, esta e ABB (Algemene Bestedingsbelasting). For di promer instante caba e medida aki a conta cu un resistencia enorme den ecomunidad (muy en especial di parti comercio) cu a termina den un conflicto interno entre Minister Presidente y e Minister di Finanzas. No tin un decision definitivo riba e tema, pero nos no por descarta cu e palabra "ABB" lo bolbe resona durante 2016. Por ultimo, por poco Aruba a hera sera conoci cu un accijnsbelasting a "Kwartje-van-Kok" riba gasoline cu sigur lo a nifica un golpi mortal pa esnan cu ta biba leu di nan lugar di trabow manera esnan cu ta biba na San Nicolas y mester traha na hotel of esnan cu pa trabow mester hasi uzo constant di nan vehiculo manera companianan di transport manera Taxistanan, chauffeur di Autobus, companianan di delivery, etc. Riba e accijns aki tampoco no tin un decision definitivo, pero cu si a laga Aruba disgusta, sin platchi number nobo y cu un systema di sticker cu lo bira un topico polemico, no solamente pa e colornan escohi, pero specialmente serca esnan cu haña nan ta kita of corta e tint di nan auto pa acomoda e sticker.

Enseñansa
E sector di enseñansa no a conoce su mihor momentonan den 2015. E preocupacion pa e falta di atencion di parti di gobierno pa loke ta nos enseñansa ta creciendo tur dia. E problema di tanto nivel como profiel di e diplomanan HAVO/VWO di Aruba ta uno hopi critico, un problema cu por perhudica centenares di hoben den un futuro sercano, y ta parce cu e gobierno aki no tin ningun interes den e problema aki. Ainda no tin claridad kiko lo bai pasa cu nos studiantenan cu termina nan estudio HAVO/VWO di cual nan profiel no ta cuadra cu esun di e studiantenan na Hulanda. Pues un icongnita total te ki dia nan por sigui haya nan cupo na HBO y Universidadnan Hulandes na momento cu nan termina nan scol na Aruba. E falta di atencion na calidad di enseñansa ta otro preocupacion grandi bou di hopi docente y mayornan, pero no tin placa y sigur ningun atencion di parti di gobierno pa atende cu e punto aki. Y despues di 6 aña di Gabinete Eman te ainda no por cumpli cu e bario di Noord pa nan por haña sikiera un MAVO/HAVO. Manera ta conoci caba, e scol aki a wordo sacrifica p’asina por paga pa e tram den Caya Betico Croes y awe Noord tin un edificio na e crusada di ex-Rio Grande - e famoso MFA - cu te ainda gobierno di sr. Mike Eman no por caba di splica su balor agregra na e comunidad.

CAFT y entrega di autonomia
Despues cu den 2014 e gobierno di sr. Mike Eman a ser poni bao curatela door di Reino Hulandes mediante implementacion di un KB (y esaki debi na e presupuesto irealistico aproba door di fraccion di AVP den Parlamento), den 2015 e gobierno aki ta pone tur grito di guerra, lagrima y Ensure atras, y ta firma un protocol na mei ultimo, caminda entre otro nan ta bay di acuerdo pa pais Aruba tambe cay bao di un supervision financiero di CFT (CAFT), mescos cu ta e caso na e otro islanan di Ex constelacion Antiyano. Dia 27 di augustus 2015 e ley di LAFT a ser aproba den Parlamento door di fraccion di AVP y cu esaki tambe nos autonomia financiero a ser entrega den teblatchi plata na Hulanda. Pues e dia aki tabata un dia scur pa Aruba. Riba e dia aki e decision politico mas impactante den historia di pais Aruba desde su Status Aparte a keda firma den su historia como den ley den parlamento. Pero ta parce cu e gobierno aki no kier siña su les, ya cu e presupuesto 2016 cu a ser entrega recientemente tambe ta irealistico segun Raad van Advies y CAFT. Y colmo de los colmos ta e situacion caminda e gobierno actual kier bay bende un gran cantidad di edificio di gobierno y p’asina nan por haya placa pa tapa e buraco cu tin den e presupuesto supletorio di 2015.

Sinembargo tin un dicho den nos dushi Papiamento cu ta bisa cu “penado no ta pena pa largo”. E dianan di Gabinete Mike Eman II ta conta y Aruba ta mira cu speransa renoba den un direccion nobo. Parlamentario Besaril ta termina bisando “Mi tin tur confiansa cu 2016 lo trece un miho situacion pa Aruba y cu solo di berdad lo sali pa un y tur den 2017”.

Expresionnan haci den e articulo aki no necesariamente ta refleha opinion di ArenaPoliti.co