VISION, DETERMINACION Y CURASHI 

ORANJESTAD -- Den Parlamento e parlamentarionan ta debatiendo riba e presupuesto 2016. Remarcable den e debatenan tabata na momento cu Lider di fraccion di MEP no solamente a lansa critica contra e mal maneho di gabinete Mike Eman, pero mes momento a presenta solucionnan pa atende cu e problemanan.
E tema di criminalidad a wordo discuti un biaha mas, mirando e preocupacionnan grandi den comunidad riba e tereno di criminalidad.
Especialmente e inseguridad cu tur hende ta sinti tin e lider di MEP preocupa. 

"E minister tin 6 anja ta purba pero no ta logra hasi nos pais mas sigur. 6 anja largo e no por duna nos cifra di criminalidad. 6 anja sin jaarverslagen di Ministerio Publico. 6 anja largo e no a presenta un plan. 6 anja largo e minister ta morto na sonjo, y criminalnan ta fiesta. Nos no por sigi asina. Ta momento pa hasi cosnan drastico. Nos no por sigi hasi e mesun cosnan y spera resultado diferente. Pesey Aruba mester haya un minister di husticia nobo.
Y pesey mi ta pidi sr Mike Eman pa apunta un minister di husticia nobo. Mi no por kere cu den henter e seno di AVP bo no por haya ningun.  Aki den parlamento mes tin cu por hasi mucho mihor trabou cu Dowers. Pero si bo no por haya un den seno di AVP of si bo no ta confia ningun, busca un vakminister, mescos cu bo a hasi cu finansas. Pasobra pa e funcion ey tampoco bo no a confia ningun di e 13 parlamentarionan", lider di MEP a duna di conoce.

SOLUCION DI MEP:
Con pa hasi Aruba mas sigur? E problemanan ta serio, pero nan no ta dificil pa soluciona. Prome bo mester di un vision real y no 'ad hoc' manera ta e caso awor. E vision di MEP ta: combati crimnalidad cu man duro y percura pa nos pais bira mas sigur. Esaki nos por logra solamente cu determinacion y cu curashi pa caba cu e abusonan cu ta tumando lugar awor.

Mas especificamente Lider di MEP Evelyn Wever-Croes a duna algun ehempel cu mester wordo ehecuta mesora:
• Enfoca mas riba prevencion, y percura pa nos tin mas Polis riba caya 
• Equipa Cuerpo Policial cu suficiente personal y material
• Control sumamente estricto di nos costanan pa evita importacion ilegal di droga, arma y hende
• Combati adiccion y brinda e guia y tratamento cu cada adicto mester
• Crea un plataforma nacional concentrando tur esfuerzo pa hasi Aruba mas sigur

"Ta algun paso cu no ta dificil pa ehecuta, pero cu determinacion y curashi bo por ehecuta nan. E minister actual no por ehecuta nan, ni e gobierno actual tampoco. E minister actual a purba tur cos caba den 6 anja, e no a logra. Ta momento pa un cambio, y bou di un maneho di MEP cu un Minister di Husticia nobo cu si tin e determinacion y curashi pa combati criminalidad cu man duro, nos lo hasi Aruba mas sigur. ", segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co