ORANJESTAD – Minister di Defensa Hulandes Jeanine Hennis-Plasschaert (VVD) ta na Aruba pa dos dia di trabou. Durante su bishita el a presencia un simulacro na e base militar na Savaneta y riba e fregata Zr. Ms. De Zeven Provinciën. "E tipo di ehercicionan aki ta di vital importancia. Asina nos por contribui debidamente ora un desaster tuma luga aki of den region”, Minister di Defensa a bisa.

Asistencia y ayudo na momento di desaster ta un di e tareanan principal di Ministerio di Defensa den Region Caribense.,,E sosten cu Defensa por brinda na momento di desaster ta hopi importante. Claro cu nos no ta haci nada riba nos mes. Nos ta actua ora autoridadnan local haci un apelacion riba nos. Asina nos ta yuda otro y nos por ta orguyoso cu hunto den Reino nos por haci esaki”, e minister a bisa.

Hennis tabatin mainta un combersacion cu Prome Minister Eman y ministernan Dowers di Husticia y Bermudez di Finanzas. Tambe el a haci un bishita cerca gobernador Refunjol. Gobernador Refunjol a wordo gratamente sorprendi cu un condecoracion pa su ayudo constante na Defensa y su personal aki na Aruba durante 12 aña largo.

Cu e ministernan di Aruba Hennis a papia riba funcionamento di Kustwacht y Defensa na Aruba.,,Nos a papia tambe riba economia, pasobra sali di e crisis tambe ta un tema comun.” Pa loke ta cuido di e fronteranan y mantencion huridico, e combersacion a enfoca mas tanto con combati criminalidad riba tereno di droga y e problema di migracion. Hennis a bisa cu e problema di droga tin e prioridad mas halto pa Defensa na Aruba, pero cu e tin e impresion cu e no ta algo cu ta empeorando. E tension creciente cu pais bisiña Venezuela tambe tabata un tema cu a wordo discuti cu e ministernan di Aruba. “E contexto geo-politico ta keda un punto di atencion. Nos ta sigui e desaroyonan pa loke ta e region aki di cerca. Na Europa tambe nos tin di haci cu e problema di migracion, pero esey ta sosode aki tambe, aunke di un otro forma.

Evidente ta cu nos mester di otro masha hopi mes y hunto mester reparti e responsabilidad pa por soluciona e problemanan aki cu ta surgi."

Expresionnan haci den e articulo aki no necesariamente ta refleha opinion di ArenaPoliti.co