“Mester cuminsa segura nos costanan, y despues pone orden paden den nos pais” 

STA CRUZ – Aruba den ultimo dianan ta wordo asota cu ola di criminalidad. Asesinato, tiroteo, atraco arma, sin solucion. Tur esaki ta consequencia directo di e mal maneho di gabinete Mike Eman, cu desde 2009 a para tur e proyectonan di MEP cu tabata bringa criminalidad cu man duro, y no a bin cu nada na su lugar. “Pesey ora mi a scucha minister Dowers declara na prensa cu MEP ta sostene e criminalnan, mi mester a reacciona mesora. Sea minister Dowers tabata bou di hopi presion y ta papia coi loco, of su cabes no por ta bon pa bisa algo asina. MEP ta e UNICO partido cu realmente a bringa criminalnan, cu man duro. Ta na man di AVP criminalnan ta fiesta, y ta parse berdad cu AVP ta gusta e situacion insigur cu Aruba ta aden awor aki”, segun lider di MEP.

PROBLEMANAN SERIO DI NOS PAIS 
Lider di MEP Evelyn Wever-Croes a indica un biaha mas cu e problemanan di nos pais ta serio, pero e solucionnan no ta dificil. Nos por surpasa e problemanan, pero nos mester tin un vision bon cla con pa hasi Aruba mas sigur pa tur cuidadano. Nos mester tin determinacion pa actua cu man duro contra criminalnan, y prepara e leynan necesario cu prioridad. Y finalmente nos mester tin curashi pa caba cu abuso. “Mi ta conbensi cu si nos pone un vision cla nos dilanti, nos mustra determinacion y curashi pa combati criminalidad, nos lo logra, pero no cu e gobierno aki, y sigur no cu Minister Dowers” segun lider di MEP.

SOLUCIONNAN DI MEP 
Lider di MEP Evelyn Wever-Croes a presenta algun solucion cu MEP ta boga p’e, cu ta demostra e vision, determinacion y curashi. MEP ta propone un plan cu dos paso.
“Paso 1: Nos mester cuminsa cu segura nos costanan pa stop importacion ilegal di hende, arma y droga. Pasobra tanten cu nos no segura nos costanan, nos no por pone orden paden den cas. Con nos ta hasi nos costanan mas sigur? Bin bek cu e radarnan, of manera mi colega Besaril a propone, usa drones pa vigila e costa manera e radanan chikito tabata funciona. Bin bek cu e helicopter, pasobra awor ora un preso hui, no tin ni helicopter pa buske. Regla e posicion di Warda Nos Costa, duna nan e autoridad y especialmente material pa nan por traha, pa asina nos por controla nos costanan mihor y segura nan.
Una bes paso 1 ta implementa, nos por cuminsa traha na paso 2: pone orden paden den cas. Combati criminalidad cu man duro, sino criminalnan ta tuma over. Nos mester mas polis riba caya, y mester duna departamentonan di husticia material pa nan funciona. Pasobra e forma con empleadonan di KIA, KPA, Imigracion, CEA, Warda Nos Costa, Brandweer mester eherse nan trabou, ta bergonsoso, y no ta digno di un pais cu ta pretende di ta 5 strea. Hues a bolbe bati mahos riba dede di minister di husticia riba e situacion deplorable na KIA cu awor hasta ta un berguensa pa henter Reino. E minister mes ta keto keto riba esaki.Pa trese mas seguridad y trankilidad den e area turistico, mester introdusi ‘tourism police’ specialisa pa opera na un forma cu no ta intimida turista, pero manteniendo orden den area turistico. Esakinan ta apenas algun di nos plannan pa trese bek e seguridad den nos pais. Cu e vision aki, y cu e determinacion y curashi cu MEP semper a demostra pa combati criminalidad, nos lo logra sigur” lider di MEP a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co