Nacionnan Uni tin un aprecio grandi pa liderazgo di Prome Minister Eman 

ORANJESTAD -  Via skype M. Gyan Chandra Acharya di Nacionnan Uni a compaña Prome Minister Mike Eman y Minister Benny Sevinger den anuncio di e P3A Conference ( www.p3a.org ), cual ta tuma luga dianan 22, 23 y 24 di maart benidero na Aruba. Esaki ta un conferencia riba realisacion di proyectonan sostenibel via e sistema di Public Private Partnership cu cual Aruba a acumula basta experiencia. Sr. Acharya ta Under-Secretary-General y Alto Representante pa “Least Developed Countries, Landlocked Developing Countries and Small Island Developing States “. Joyceline Croes, RaadsAdviseur di Prome Minister Mike Eman y Esther Emerencia-Gomes, Colaborador di Comunicacion pa e Conferencia P3A tambe tabata presente.

Durante e conferencia internacional aki -  cu ta wordo realisa den colaboracion di Reino Hulandes, y Nacionnan Uni y Aruba - lo trata temanan importante manera: Lama, Conectividad, Agricultura sostenibel, Turismo sostenibel, desaroyo di energia renobabel, infrastructura y financiamento.

Embahadornan di 37 nacionnan Isleño di tur parti di mundo ta bay ta presente den e conferencia aki pa reinforsa e cooperacion pa yega na realisa e  metanan di desaroyo sostenibel, relacionista publico Esther Emerencia-Gomes a duna di conoce.

Pa Aruba ta un orguyo grandi di a wordo elegi door di Nacionnan Uni  como cede di un Conferencia asina grandi. “Esaki no a bini di un dia pa otro. El a bini a base di un pensamento y enolvimento hopi activo di Aruba riba tereno internacional unda cu continuamente nos a bin ta participando riba forumnan di UN y Internacional presentando Aruba su vision di un desaroyo sostenibel,” Prome Minister Eman a splica den e conferencia di prensa. El a agrega cu ta un orguyo pa tin un partner manera Nacionnan Uni den un conferencia asina importante.

Den e forum internacional aki, ta bay pone hopi enfasis riba e hecho con islanan chikito cu no tin e recursonan manera paisnan grandi tin, toch por realisa proyectonan grandi, riba caminda di sostenibilidad pa nan pueblo. Algo cu Aruba a bin ta trahando riba dje pa algun tempo caba.

Durante e conferencia aki tambe ta bay tin un side-event, segun Minister di Infrastructura Benny Sevinger a splica. “E ta un dia importante pa Aruba, pasobra e conferencia aki ta anuncia e Conferencia PPP pa Aruba cu ta conta cu participante di 37 pais cu ta bay papia riba diferente tema,” e mandatario a bisa.

El a splica cu den e side event lo tin companianan rond mundo presente cu ta trahando proyectonan pa cualnan ta busca financiamento. Pesey tambe lo tin representantenan di institucionnan financiero presente. Di e forma aki por cera partnershipnan importante di biaha entre e interesadonan.

Joyceline Croes, Consehero di Prome Minister Mike Eman a splica di un otro aspecto importante cu lo tuma luga e dianan ey, cual ta apertura di e Centro pa Excelencia cual ta un banco di informacion cu tur loke cu tin di haber cu PPP y cu ta accesibel pa tur paisnan miembro di Nacionnan Uni.

M. Gyan Chandra Acharya den su declaracion via Skype a expresa cu, despues di e conferencia climatico na Paris, awor ta un bon momento pa pone atencion riba e tema di desaroyo for di diferente perspectiva. Pesey Nacionnan Uni ta hopi orguyoso cu e conferencia na Aruba, durante cual ta pone enfasis riba e cambio grandi di e rol di sector publico y priva den desaroyonan global. El a recorda su combersacion den e diferente forumnan unda cu el a topa cu Prome Minister Mike Eman y a expresa di ta aprecia e liderazgo di e mandatario di Aruba pa cual Nacionnan Uni ta apoya e conferencia na Aruba, unda cu ta spera di bini cu modelo y proyectonan pa PPP den diferente area. ‘Nos ta contento di por comparti e pensamento riba e miho practicanan,” el a expresa.

Tur esnan interesa por subi riba e website www.p3a.org pa mas informacion.

Expresionnan haci den e articulo aki no necesariamente ta refleha opinion di ArenaPoliti.co