Diahuebs den Parlamento un biaha mas parlamentarionan di AVP a demostra un nivel masha baho y bergonsoso. Sra. Desiree Croes y sr. Melvin Tromp a haya ta bon pa acusa Parlamentario di MEP, sr. Guillfred Besaril di violacion sexual di un menor. Algo cu a cai den masha mal tera den hendenan di MEP, pero hasta den hendenan di AVP. 
E Parlamentarionan di AVP a haya reaccionan fuerte mesora. Lider di MEP a bisa cu nunca el’a tende algo asina, y cu e ta storia dificil pa kere. P'esey mes a bisa bon cla, cu ta Ministerio Publico mester bai cu algo asina serio. Si nan no bai Ministerio Publico, nan ta complice na e acto aki.

Parlamentario Xiomara Ruiz-Maduro a mustra sra. Desiree Croes, cu ta un berguensa cu e ta hunga politica cu dolor di hende, cu si algo asina ta berdad mes, sra. Croes ta causa hopi danjo mes na e victima y e confiansa cu e la deposita den dje.

Sr. Guillfred Besaril a duna un desertacion den Parlamento, indicando cu e acusacion contra su persona ta totalmente falso! Den e mesun desertacion, sr. Besaril a elabora riba su infancia, y un experiencia dificil cu e la pasa aden y kiko ta un di e factornan importante cu na un edad relativamente hoben di 18 aña a hibe den e direccion di Husticia y Polis. Sr. Besaril tabata un polis cu den su carrera di 20 aña, a traha pa 3 aña den departamento di Droga y Crimen Organisa. Un decision y reto cu e la tuma pa cuminsa duna su contribucion na comunidad di Aruba den combati un plaga cu te e dia di awe ta afecta nos hubentud. Despues den su carrera policial, sr. Besaril a traha pa casi 4 aña den e departamento Specialisa di "Kinder- en Zedenpolitie".  Pa por a traha den e departamentonan aki, e oficialnan policial mester pasa un screening riguroso di Procuroria General, Seguridad Nacional y Top di Cuerpo Policial.  Den caso cu un hecho asina tabata berdad, HAMAS sr. Besaril lo por a pasa e screening y traha den e departamentonan aki..

Pues awor cu un screening asina a tuma lugar den pasado, no por tin duda mas!

Sr. Guillfred Besaril, mientras tanto lo entrega keho na Ministerio Publico contra tanto sra. Desiree Croes y ta evaluando cu abogado riba un caso di posibel rectificacion contra sr. Melvin Tromp, pasobra tin hurisprudencia di corte di casacion cu ta mustra cu no ta semper un Parlamentario por sconde tras di su imunidad parlamentario y insulta na su antoho.

Expresionnan haci den e articulo aki no necesariamente ta refleha opinion di ArenaPoliti.co