ORANJESTAD -- Parlamentarionan di MEP a acudi na Ministerio Publico relaciona cu e papel cuestionabel cu minister Otmar Oduber a hunga den e asunto di Logo di Aruba y demas destahonan na companianan liga na su persona. No solamente e informacionnan cu a wordo divulga recientemente durante e conferencia di prensa di minister Otmar Oduber, sino mas bien e defensa cu e minister a duna, tabata pa nos motibo pa bai
Ministerio Publico.
E defensa di e minister a hinca e minister den mas problema ainda pasobra e ta contradesi su mes cada biaha mas. Prome ta menciona cu un compania a gana e destaho di e logo, despues ta bisa cu ta un otro. Pa colmo, ningun di dos tabata existi na momento di e destaho, ta con nan por a gana e destaho e ora? Tambe tin e asunto di ken ta donjo di e companianan: di e prome minister Otmar Oduber a bisa cu e tabata donjo, hunto cu e senjora di su miho amigo. E otro compania ta di su miho amigo, hunto cu senjora di e miho amigo. Esaki ta indicacion directo di conflicto di interes!
En bista di e hecho cu Ministerio Publico tin mas forma na su disposicion pa investiga, nos a urgi Ministerio Publico pa investiga e caso aki. Pueblo di Aruba ta exigi un investigacion pa asina yega na fondo di esaki.
Ministerio Publico a ricibi parlamentarionan Xiomara Ruiz-Maduro y Dangui Oduber y lo traha riba e caso.
Casonan asina mester wordo denuncia pasobra mester bai un senjal hopi cla na tur politico y especialmente gobernantenan cu casonan asina no ta aceptabel. Cu e paso aki parlamentarionan di MEP a cumpli cu tantisimo peticion di cuidadanonan di nos pais pa trese e caso aki na atencion di Ministerio Publico.

Expresionnan haci den e articulo aki no necesariamente ta refleha opinion di ArenaPoliti.co