Awor cu a bin un disputa entre Minister Oduber y e periodista Speed, Pueblo a haya e oportunidad unico di tende pregunta skerpi di e periodista den direccion di e mandatario. Sinembargo e contestanan duna pa Minister Oduber ta pone nos saca e conclucion cu e chens ta grandi cu tin practicanan a tuma lugar cu no ta cuadra cu bon gobernacion. Cumpliendo cu nos trabou parlamentario, Fraccion di MEP a manda 25 pregunta na Minister Oduber pa asina e mandatario duna un mihor splicacion di locual e mes a declara den e disputa aki. Pero mirando e embergadura di locual e periodista Speed ta cuestiona, ta na su lugar pa Ministerio Publico tambe recibi e preguntanan aki pa asina nan por tene esaki den consideracion na momento di haci un investigacion na e iregularidadnan cu ta implica e mandatario. Pasobra for di tur e guera entre Minister Oduber y e periodista Speed ta bira bisto cu e mandatario muy probablemente di un manera directo of indirecto lo ta benificiando su mes of esnan hopi serca di dje di e negoshi cu e logo di nos Pais. Pa e bienestar di nos Pais nos ta di opinion cu Ministerio Publico mester investiga Minister Oduber su envolvimento den e negoshi cu e logo di Pais Aruba. E senial mester wordo manda pa mandatarionan actual y esnan di futuro, cu practicanan na unda cu un Minister ta abusa di su pocicion pa beneficia su mes of esnan hopi serca di dje na un manera directo of indirecto no ta aceptabel y ta contra e bon gobernacion di un Pais. Nos ta spera cu Ministerio Publico lo por yega na e decicion y e informacion necesario pa asina haci un investigacion pa pone un paro na practicanan cu ta haci asina hopi danio na e democracia di nos Pais.


5 april 2016

Expresionnan haci den e articulo aki no necesariamente ta refleha opinion di ArenaPoliti.co