Nos a tuma nota di e anuncio di Minister di Labor sr. Paul Croes referente instalacion di un "Help desk" pa supuestamente “ yuda esnan cu kier haya trabou y solicita na CITGO unabes e apertura di e refineria na Aruba tuma lugar. Remarcabel ta e hecho cu algo asina ta desvia di e procedura normal di Departamento di Labor. Ademas mester enfatisa cu e "Help desk" ta viola e confidencialidad di esnan cu kier solicita y atacha e profesionalismo den e procedura pa yena vacaturanan den e refineria.  E accion aki logicamente ta cuestionabel den tur aspecto pasobra nunca antes algo asina a tuma lugar.  De facto bo por mire cu un Minister ta bai asina leu pa mete den asunto di aplicacion di un compania priva. E ora ta surgi e pregunta ta kiko ta su meta y intencion real cu e paso iregular aki ?

Ta obvio si cu awor cu falta poco menos di 1 aña y mey pa eleccion AVP y e Minister di Labor a drenta den "campaign mode" y pa medio di posibel reapertura di refineria kier trata na cumpra voto un biaha mas pa keda na poder pasobra di otro forma e lo no ta posibel mas. Logicamente e asunto aki ta condenabel vooral ora cu nos a demostra caba den articulonan anterior cu e maneho actual no ta consistente y Minister aki tawata basha firma y duna aprobacion pa permiso di trabou ("eerste aanvraag")a la grandi siendo cu tin desempleo local. Aparentemente for di informacionan ricibi por a compronde cu e "Help Desk" aki a wordu ortoga na un compania priva pa haci e “werving & selectie” cu esnan interesa pa traha na refineria CITGO. Mas cu claro algo asina ta inmoral, contra principio, no transparente y ta duna indicacion atrobe di kier hasi negoshi cu pan di hende! Si esei resulta di ta e caso, nos di oposicion kier sa :  Ken ta e compania priva aki ? Pero tambe haya un clarificacion si CITGO a pidi pa instala esaki. Aunke esaki ta dificil pa kere si pasobra te dia di awe ningun deal concreto a wordo sera cu CITGO pasobra e negosacionnan cu CITGO a wordu extendi cu por lo menos 6 siman, segun Minister di Economia de Meza. 

Sinembargo no ta kita afor cu Minister Paul Croes ta strobando y na e mesun momento desacreditando su propio colega Minister Mike de Meza cual ta den un negosacion complica manera  e mes a indica. Realidad ta cu e accionan di Minister di Labor lo por perhudica negociacionan cu CITGO si nan cuminsa desconfia riba proceduranan irregular, intransparente y metemento directo den asuntonan interno y importante di un compania priva manera CITGO!

Si Minister Paul Croes di berdad kier contribui cu algo positivo y na bienestar di e futuro trahadornan e mester respeta proceduranan stipula di Departamento di Labor y purba na re-enforsa cu hende local ta esnan cu
primeramente ta bin na remarke pa yena vacaturanan na Aruba y ora NO TIN PERSONAL LOCAL DISPONIBEL pa cierto funcionan cu ta rekeri cierto specialidad otro persona di exterior lo por bin na remarca. Lamentablemente su helpdesk no tey pa garantisa esaki y lo wordo usa solamente pa purba saca beneficio personal y pa partido AVP ignorando bienestar general. 

Casonan recien ta manda un señal pa pueblo cu trahadornan no tin atencion di e Minister di Labor actual y esei por a wordo mira ora Minister Paul Croes a hui pa derechonan y proteccion di trahadornan di AURA casino, caminda 44 tata- y mamanan ta sin trabou, entrada y perspectiva pa 4 luna caba. Ehempel di fixmento di permiso y duna instruccion via whatsapp pa un dama haya un permiso pa un job den bar no ta algo pa gaba menos ta orguyoso cune y logicamente ta crea desconfiansa den e manera con Minister Paul Croes ta maneha e cartera laboral. Por ta e "Help Desk" anti-ley y procedura ta pa fix loke ta cumbini’e politicamente y financieramente ? Ta pesei e Help desk di Minister Paul Croes aki serca nos di oposicion no ta confiabel. Tur esaki ta pone cu nos di oposicion ta bai vigila e asuntu aki y na e mesun momento ta haci un yamada na sindicato, di cual miembronan biaha pasa a perde nan trabou na Valero (debi na maneho di gobierno di AVP cu kier desmantela e refineria) pa ta extra critico! 

Expresionnan haci den e articulo aki no necesariamente ta refleha opinion di ArenaPoliti.co