ABUSO SEKSUAL TA UN CRIMEN. 
Abuso seksual ta un crimen. Un acto castigabel. Un crimen cu ta afecta un mucha emotional y fisico na un manera grave y mayoria biaha permanente. Den esaki nos no por discrimina a base di sexo. Abuso di mucha homber ta mesun grave cu abuso di mucha muher. Lamentablemente, abuso sexual di mucha homber, hopi biaha no ta wordo raporta y asina e problema ta keda casi invisibel. Ora cu un mayor ta discrubi cu su yiu muher of su yiu homber a wordo abusa sexualmente y e ta scohe pa raporta esaki, ta importante pa tur instancianan concerni, atende cu un caso asina mas lihe posibel. Cifranan scientifico ta indica, cu e daño emotional por bira mas grandi ainda, ora cu e mucha ta ripara cu su grito pa ayudo, no ta wordo tuma na serio, cu e no ta wordo scucha. 

'DOUBLE STANDARD' 
Den nos comunidad, tin biaha nos por tende un homber bisa cu el a perde su virginidad na un edad hoben, por ehempel cu 12 of 13 aña, door cu el a wordo hiba cerca un muher di bida. Esey tambe ta un ehempel di abuso sexual. Tambe tin homber cu ta broma cu na un edad di 14 aña nan tawata tin un 'relacion sexual' cu un hende muher cu ta mas cu 10 of 20 aña nan mayor. E persona no ni sa cu esey tambe ta abuso sexual. Tanten cu e hoben ta menor di edad, ora un hende di 18 aña bay ariba tene un relacion sexual cu n'e, pa ley e ta keda un abuso sexual. Ley ta hasta indica, cu e no ta importa  si bo tawata sa e edad di e hoben si of no. Relacion sexual di un adulto cu un menor di edad ta un crimen y ta castigabel. E no ta un relacion sexual, e ta abuso sexual. E supuesto 'double standard' cu por wordo uza, no ta na su lugar. No ta importa si ta mucha muher of mucha homber pa determina e gravedad y si mester actua. 

INVISIBEL
Abuso seksual di mucha homber hopi biaha ta keda invisibel, pasobra e no ta wordo raporta. E causa di esaki lo por ta falta di conocemento, pero tambe berguensa. Nos por nota cu ta midi cu dos midi por ehempel  den dos situacion extremo: 1) tin hende cu ta hiba un mucha homber na un muher di bida, caminda 2) un mucha muher ta wordo sera den cas. E mesun 'double standard' ta wordo aplica si e abusador di un mucha homber ta un hende homber of un hende muher. 

VIOLACION
Ora e abusador di un mucha homber ta un hende muher, tin hasta e tendencia pa yama esaki un 'relacion' enbes di violacion.  Uzo di idioma asina, por haci mas daño ainda na e mucha. 
Abuso sexual di mucha homber door di hende homber tambe ta un topico hopi delicado. Den un comunidad chikito manera Aruba, mayornan tin biaha ta scohe pa no raporta esaki, pa asina proteha e mucha. Pero asina e abusador por sigui abusa di mas mucha.

1984
Personalmente, mi kier extendi un palabra di sosten na e tata cu ta bringa pa e derecho di su dos yiu hombernan, pa e caso aki haya debida atencion di e autoridadnan. Como mayor e ta bo deber pa proteha bo yiunan, pa ta nan voz, nan man y pia y bringa e caso aki pa nan. Mi ta lamenta cu e mester a haci actonan di desesperacion pa e caso aki haya e atencion cu e merece. Un yiu, un mucha, tampoco no ta djies cualkier hende y cada caso di abuso sexual, ta un di mas. Aki nos no por traha cu porcentahe. Mi sa sigur cu den e wowonan di su yiunan, ya caba e tata ta un heroe, pasobra e ta bringa pa husticia y pa su yiunan por crece sano y salbo, sin wordo abusa na un manera sexual door di un homber. Den e buki di George Orwell: "1984", a wordo bisa cu nos tur ta igual, pero tin cu ta mas igual cu otro. Aruba tambe tin su version: 'Hij is niet zomaar iemand.' Caminda nan kiermen cu no tur hende ta haya e mesun trato. E ta berdad, e tata aki, no ta djies cualkier hende! 


Mireille Sint Jago

Expresionnan haci den e articulo aki no necesariamente ta refleha opinion di ArenaPoliti.co