Diasabra siman pasa, e director di DOW a declara ‘Caretera sin banchi no ta nifica cu e lo ta di mal calidad’ (Bon Dia, 31 Maart 2016). Aki e director no tabata referi na cualkier caminda. Aki e director tabata referi na e ‘Caminda Scur’. E caminda mas caro den Aruba su historia cu ta costa casi 94 mil florin pa meter. P’esey e declaracion aki, ta hopi straño y cuestionabel.

• Ta e mesun director aki a bin, algun aña pasa, cu e maneho pa pone ‘betonband’ (banchi) structural na tur caminda principal di Aruba. Hopi biaha nos por a tende e director bisa den diferente entrevista, cu esakinan tabata necesario pa conserva e careteranan miho. Niun caminda nobo of algun cu a wordo renoba, a scapa di e maneho aki. Pero diripiente pa e caminda mas caro (750 miyon florin), e maneho di banchi no ta conta mas;
  
  
• E caminda existente paralel na e ‘Caminda Scur’ si tin banchi. Camindanan cu menos intensidad di trafico si tin banchi. Pero husto esaki, cu tin un trayecto cu hopi subida y bahada, segun DOW, e cortamento di awa lo no tin efecto. Pasobra ‘e contratista ta bay aplica un sistema cu ta funciona na su pais’. Na e proyecto ‘Linear Park’, un contratista tambe ‘lo a pone klinker cu mashin’, manera e tabata haci na su pais;
  
  
• E ta casi imposibel pa kere cu un banchi di algun centimeter, cu mester ‘conserva e caretera miho’, lo aumenta e prijs di e caminda aki substancial;
  
  
• Diripiente e director ta corda cu tin camindanan di 25 aña di edad sin banchi. Esaki pa hustifica cu nan a laga e banchi afo di e ‘Caminda Scur’. Ki ‘hustificacion’ bobo. Tur caminda principal cu un intensidad halto di trafico na Aruba, tin banchi.
  
  

E no ta e intencion pa pone e director den un luz negativo, pasobra ta gobierno ta esun cu a pasa parlamento e ‘fastball’ y a hinca pueblo den e hazaña di corupcion aki. Pero momento cu e director tambe kier pasa pueblo un ‘fastball’, anto ta e a pone su mes den e posicion unda e lo por wordo cuestiona. Riba dje, bo ta spera mas di un profesional y un ambtenaar cu a huramenta pa sirbi e interes di e pais aki y ningun otro interes. Dus ni su interes, esun di e minister of esun di e contratista.

Ta e mesun director aki, riba 21 October 2015 durante e revelacion di e borchi di e brug ‘Caminda Scur’, a mustra cu e minister-president a gaña ora e minister a declara cu ‘a haci un estudio riba impacto social y ambiental pa FULL e proyecto’. Den su ‘entusiasmo’ pa trece claridad, e director tambe a mal informa pueblo intencionalmente ora e la bisa cu e compania encarga cu e supuesto MER, Americas Sustainable Development Foundation (ASDF), lo a entrega e rapport caba. E berdad a sali un siman despues. Riba 27 October 2015, e compania ASDF tabata invita ‘multi-stakeholders’ pa un reunion y e mes tabata papia di ‘ASDF is currently in the phase of DRAFTING the final DRAFT’.

Tambe e director aki tabata esun encarga cu diferente PPP-proyecto, cu no a resulta faborabel pa Aruba y su situacion socioeconomico. Hasta awendia algun gremio ta cuestiona y pidi pa investiga e proyectonan PPP.

Tampoco e ta un secreto publico cu na e departamento tambe tin hopi cos cuestionabel ta pasando, pero tur cos ta wordo hinca den e ‘doofpot’, documentonan ta disparce misteriosamente of translada pa e ‘kluis’ di e director y/o e ‘small fish’ so ta wordo geschors’.

Observacionnan:

Normalmente ta esun cu ta paga ta dicidi. Anto dicon awor ta esunnan cu ta construi, ta dicidi kico ta bon of no? Ken tin real e supervision di e proyecto ‘Caminda Scur’? DOW tin atrobe e rol di ‘Sancho Panza’?

Tambe ta custumber cu pa cada proyecto di DOW, tin un ‘bestek’. Anto e lo ta bon pa sa si den e ‘bestek’ di e ‘Caminda Scur’, tabata tin banchi. Y si no, kico a conduci cu DOW a cambia su maneho di banchi?

Imagina cu e director di DOW no tin rason atrobe. Kico lo ta e gastonan di pone banchi toch? Ta pueblo lo bay paga pa e ‘meerwerk’? Y si pueblo no paga, e contratista (alabes doño pa e siguiente 25 aña) lo cera e uzo pa publico?

Ainda ta fresco den pueblo su memoria e blundernan costoso di  DOW den e proyectonan miyonario di ‘Linear Park’ y tram, pa menciona djis algun. Anto ki garantia pueblo tin cu atrobe DOW no lo blunder cu e ‘Caminda Scur’? Corda cu cada biaha cu DOW blunder, e ta costa pueblo miyones!

Ta straño y increibel pa scucha cu e caretera mas costoso di Aruba, casi 94 mil florin pa meter, no tin un banchi. Mientras net banda di e ‘Caminda Scur’, esun bieu si tin un banchi. Ta pa pret e Hulandesnan, cu ta conoci mundialmente pa nan proyectonan di infrastructura, a pone e banchi na e caminda e tempo ey?

(www.aboaruba.org , This email address is being protected from spambots. You need JavaScript enabled to view it. )

Expresionnan haci den e articulo aki no necesariamente ta refleha opinion di ArenaPoliti.co