E proyecto ‘Caminda Scur’ a cuminsa cu hopi gañamento, y ainda e gañamento ta sigui pa trata di convence pueblo cu no tin corupcion den e caminda mas caro den Aruba su historia. Esaki si ta algo historico. Nunca antes bisto, tanto naturaleza a wordo destrui asina lihe. Esaki pa un gobierno di un signatura Cristian cu tin su boca yen di ‘Sostenibilidad’ y ‘Green’. Nos ‘flamante y dinamico’ parlamentarionan a duna gobierno aprobacion, pa construi un caminda di apenas 8 kilometer pa 750 miyon florin (casi 94 mil florin pa meter), sin un dia wak of puntra gobierno pa e Milieu Effect Rapport (MER). Gobierno su unico interes tabata e ‘finder’s fee’ miyonario, cu algun hende lo a cobra y cu nan lo a haya un ‘cabay di campaña’ (similar na esun di ‘Klinkers’) pa desvia atencion di e desastre financiero cu nan causa. P’esey hopi ‘lagadishi y shoco’ mester a muri y perde nan cas.

Locual gobierno no a conta riba dje, ta cu algun gremio, medio di comunicacion y partido ABO lo a cuestiona e procedura hiba y exigi publicamente pa mira e MER di e ‘Caminda Scur’. Despues di hopi biramento y gañamento di parti di gobierno, e la dicidi di busca e compania Americas Sustainable Development Foundation (ASDF) pa traha un ‘MER’, ora tur naturaleza a wordo destrui caba y Spaans Lagoen tabata na beurt. E compania ASDF no a haci un MER, pero un ‘Ecological Impact Assessment (EcIA)’ pa ‘ identify the ecological impacts..planned Spaans Lagoen bridge’.  A pesar cu e minister-president a declara cu ‘a haci un estudio riba impacto social y ambiental pa FULL e proyecto aki’ (Bon Dia Aruba, 21 October 2015).

Di tur forma, hopi placa a wordo paga na ASDF, pero nunca pueblo of parlamento por a mira e estudio aki. Tampoco por a mira kende of con a evalua e rapport di ASDF. Pero keto bay e proyecto ta sigui.

Awor siman pasa, pueblo por a lesa cu awor gobierno a haya ‘sosten’ di Alterra (Landbouwuniversiteit Wageningen) di Hulanda, pa bin cu un studio ambiental (Bon Dia Aruba, 31 Maart 2016).

Di berdad gobierno ta kere cu tur hende aki na Aruba ta mesun bobo of ciego? A pesar cu Alterra  ta un instituto di investigacion universitario, pueblo por ta sigur cu Alterra su ‘sosten’ no lo ta gratis. Riba dje, gobierno a mata tur ‘lagadishi y shoco’ caba. Dus e unico cos cu Alterra por haci awor, ta traha un otro rapport bunita y costoso, pa gobierno sigui trata di convence pueblo cu e proyecto ‘Caminda Scur’ ta ‘Green’!

Interesante pa pueblo sa e motibo pakico gobierno a core busca ‘sosten’ di Alterra, mientras cu e tabatin ASDF den servicio pa hopi placa caba. Porta cu ASDF no a cumpli of pasobra Alterra tin mas ‘peso’ y prestigio, cu lo sirbi miho pa e show di PR? Tambe e lo ta interesante pa wak kico Alterra ta haya pa su ‘sosten’. Di tur forma mas zamuro ta baha pa come algo di e restonan di e pober ‘shoco y lagadishi’. Ta p’esey no tabatin placa pa un banchi pa e ‘Caminda Scur’?

(www.aboaruba.org , This email address is being protected from spambots. You need JavaScript enabled to view it. )

Expresionnan haci den e articulo aki no necesariamente ta refleha opinion di ArenaPoliti.co