ORANJESTAD – Green Corridor ta un proyeco cu ta inclui hopi aspecto importante pa calidad di bida di nos ciudadanonan. No unicamente e ta un solucion practico pa e fluho di trafico pisa cu tin entre pariba y pabou di brug of te hasta cu ta embeyece e area entre Oranjestad y San Nicolas. Loke tambe ta importante di e proyecto ta e enfoke riba recreacion y posibilidad pa haci ehercicio, specificamente den e caso aki movecion. Cu e proyecto aki, Aruba por haya un di e 'fietspadnan' di mas largo di Caribe.

Dialuna mainta tempran trabounan importante a cuminsa pa realisacion di Green Corridor y asina a cuminsa pone e capa di asfalt di e caminda nobo, cuminsando for di banda di aeropuerto.

Prome Minister Mike Eman a tene un conferencia di prensa na e sitio, unda por a mira e congestion grandi cu tin awor den trafico cu e caminda di solamente dos via. Den esaki e mandatario a expresa cu lo bini un cambio na momento cu cambia esaki den un di 4 via y construccion di Watty Vos Boulevard.

No solamente Green Corridor lo trece un cambio den e trafico, pero tambe lo duna Aruba un di e 'fietspadnan' di mas largo den Caribe, si no ta esun di mas grandi. Prome Minister Eman a splica cu riba henter e ruta di Green Corridor ta bay construi areanan di recreacion, sea canchanan di futbol, basketball, di rollerblades y skateboarding, pero tambe areanan di recreacion sano cu sombra, unda cu grandinan por sinta y disfruta di e bista, entre aeropuerto te cu San Nicolas.

Den e diseñonan cu a wordo haci door di e Ingeniero- y Arkitectonan, ta inclui parkenan cu ta embeyece henter e area residencial, principalmente pariba di brug.

Den e proyecto aki ta inclui tambe un 'fietspad' cu ta yega te San Nicolas, cual kisas lo ta esun mas largo di Caribe. Loke cu falta, segun Prome Minister Eman, ta pa conecta e area di 'fietspad' den e Green Corridor cu esun di Linear Park, haciendo esaki di e forma mas sigur posibel. E idea ta pa haya un crusada 'safe' pa conexion di e 'fietspad', cu ta core a lo largo di  e “vierbaansweg” di Green Corridor, y cual ta un otro contribucion importante pa salud di henter e comunidad. “Esaki no solamente ta inversion den infrastructura, pero ta conecta nos vision di calidad di bida, di bienestar general, y salud  di nos hendenan. Algo cu nunca antes tabata asina prominentemente ancra den e infrastructura,” Prome Minister Eman a expresa.

Grupo Odinsa ta ehecuta e proyecto via di su empresa Caribbean Infrastructure Company- CIC, cu base na Aruba, y ta wordo representa pa nan Arkitecto Carlos Zubieta. E infrastructura completo di Green Corridor mester ta cla pa augustus, 2017.

Expresionnan haci den e articulo aki no necesariamente ta refleha opinion di ArenaPoliti.co