Aruba Certificacion Program cu un meta nobo 

Como e unico pilar economico di nos isla ta importante pa keda analisa mercadonan y bin cu strategianan pa no solamente atrae e bishitantenan pa nos isla pero tambe con pa sigui genera entrada promedio di nos turismo. Dialuna mainta comision di Revpar a reuni cu Minister Otmar Oduber riba diferente punto y a repasa diferente acuerdonan cu ta forma parti integral di e strategianan pa stimula Revpar/entrada pa Aruba. Den esaki Aruba Certification Program cu tin su rol importante. Mirando cu nos ta mercadea nos isla riba un nivel halto, ta importante pa nos no descuida e aspecto di servicio. ACP ta stimula un miho servicio den tur aspecto. Na juli aña pasa, oficina di turismo a tuma e Aruba Certification Program over for di gobierno y a bin ta maneha esaki.  Sra. Ronella Tjin Asjoe-Croes directora di ATA ta splica cu a presenta na e mandatario tur e diferente pasonan cu a tuma unda entre otro a haci un investigacion na e dunado di trabou, esnan cu a manda participante y tambe esnan cu no a manda pero tambe ex participantenan di ACP, pa asina presenta un plan. Ta trata di un total di 2,852 persona cu a certifica nan mes te cu awor. Meta di ATA pa e siguiente 3 añanan ta, pa sigur haya un 100 porciento di participacion den e programa ACP specialmente cerca  e empleadonan di hotel pero tambe e resortnan cu ta cay bou di Aruba Timeshare Associations y otro gruponan cu tambe ta importante pa e sector turistico. E directora ta referi na entre otro taxistanan , organisacionnan di sector publico manera entre otro immigracion y tambe sector priva cu ta topa cu nos bishitantenan a base diario. Awor cu ta asina leu cu a pasa dor di e plan a ahusta cierto rekisitonan y a presenta esaki na Minister Oduber, ATA ta cla pa bay sigui stimula ACP publicamente reactivando asina henter e movecion di mercadeo contando cu sosten di tur e hotelnan pa yega na e meta di 100 porciento di certificacion pa final di aña 2018. E programa di ACP ta enfoca no solamente riba e aspecto servicial pero tambe riba informacionnan cu relevancia na nos cultura pero den un forma uniforma. Ta importante pa ora brinda servicio na nos bishitantenan no traspasa storianan falso. Cu e certificacion di ACP tur participante ta haya tur informacion corecto. Por menciona cu di tur e participantenan a ricibi un bon feed back y cada un ta hopi entusiasma cu tur e informacion ricibi. Nan por ofrece nan ofishi di un miho forma cu e siguridad di tin informacionnan cla pa ofrece nos bishitantenan. E mesun confiansa aki ta keda traspasa den servicio unda Aruba por ta orguyoso di tin no solamente un Producto di nivel halto pa ofrece pero tambe e servicio ta completa henter e bon experiencia di cada un bishitante pa nos isla.  

Expresionnan haci den e articulo aki no necesariamente ta refleha opinion di ArenaPoliti.co