Den mas di un forma, e proyecto ta honra su nomber 

ORANJESTAD – Na ocasion di e prome asfalt cu a basha riba caminda nobo di Green Corridor, Prome Minister Eman a tuma e oportunidad pa enfatisa e contraste entre e construccion di e infrastructura vital aki pa nos isla, cu e hecho cu e ta un proyecto ta duna honor na su nomber di ‘Green’ den mas cu un aspecto.

Gabinete Mike Eman a reevalua y haci cambionan na e plan original, cu ta data for di añanan 70) di Vierbaansweg cu e proposito pa hustamente proteha e vegetacion mas tanto di e areanan natural caminda e ta pasa. “Poco parti di mundo ta crea un infrastructura asina costoso y ta dicidi cu na ambos banda di caminda ta conserv’e pa naturalesa,” asina Minister President Eman a afirma.

Premier Eman a recorda y comparti cu miembronan di prensa con e plan cu nan a bin topa cu ne warda den un lachi pa casi 40 aña tabata diseña di forma cu lo mester a pasa dor di un cantidad grandi di tereno publico y priva, incluyendo Parke Nacional Arikok. “E trayecto lo tabata mas paden destruyendo hopi naturalesa di Aruba,” asina e mandatario a splica.

Compaña pa entre otro, Director di DOW ing. Marlon Croes, Sr. Carlos Zubieta di Grupo Odinsa y varios miembro di Parlamento, Prome Minister Eman a afirma esaki dialuna mainta despues di a inspecciona e trabounan na e sitio di construccion di Green Corridor su punto di comienso, esta net pariba di rotonde di aeropuerto.

“Nos a bisa cu e daño cu e plan original lo causa na nos naturalesa lo ta demasiado grandi y nos a scoge pa expande na banda di caminda te unda cu por y no pa e trayecto corta den naturalesa,” asina Minister President Eman a bisa acerca cu danki na e decision consciente aki di su Gobierno “a scapa un cantidad di naturalesa, cunucu di hopi di nos grandinan cu tabata cay den e tereno di e trayecto anterior.”

E di dos aspecto cu ta valida e nomber di ‘Green’ ta otro decision di Gabinete Mike Eman y esey ta cu entre e crusada di Mahuma te cu Pos Chikito no ta bay verkavel e espacio cu tin na cada banda di caminda. Tradicionalmente, ora ta traha un caminda grandi, ta destina y prepara e tereno na banda pa un desaroyo comercial. Algun ehempel di esaki ta Sasakiweg y Vondellaan. “Nos a dicidi cu apesar di e balor cu e area aki por tin, ta bay keda sin desaroya nan pa asina conserva nan berde,” tabata palabra di e mandatario.

Esaki sigur ta un decision hopi importante pasobra un inversion asina cuantioso, e desaroyo comercial lo tabata un opcion logico pa genera entrada bek pa caha di Gobierno. Sin embargo, a dicidi pa duna mas balor na naturalesa. E importancia pa e flora y fauna ta refleha tambe den e di tres punto pakico Green Corridor ta ‘Green’.

Den negociacion cu e empresa di construccion, a pone enfasis pa e proceso di construccion tin un efecto minimo riba e area rond di dje. Como tal, e compania ta den contacto cu expertonan di instancianan publico y organisacion medio ambiental local. Loke no por evita di haci, ta keda compensa di otro banda cu e creacion di varios area urbano berde manera parkenan caminda lo replanta algun di e matanan ya existente y planta otronan nobo.

Expresionnan haci den e articulo aki no necesariamente ta refleha opinion di ArenaPoliti.co