No ta bin edificio band’i caminda entre Mahuma y Pos Chikito 

ORANJESTAD – Rond di 6 kilometer di e seroe y camponan entre Mahuma y Pos Chikito ta bay keda cu nan bista habri y cu su naturalesa intacto danki na e decision di Gabinete Mike Eman pa henter a area aki permanece liber di desaroyo comercial. E decision ta forma parti di e proyecto ‘Green Corridor’ cu, manera ta conoci, ta amplia e ruta entre Aeropuerto y San Nicolas cu dos caminda mas.

Mientras cu finalmente Aruba tin un Gobierno cu a reconoce e necesidad pa alivia e fluho di trafico y haci’e mas sigur, aspectonan manera embeyecemento urbano y proteccion di naturalesa, tambe ta hunga un papel importante den su ehecucion. Pa tal motibo y for di prome instante, Minister President Mike Eman den deliberacion cu Minister di Infrastructura Benny Sevinger, a pone como prioridad pa e bista natural cu ta compaña e caminda aki banda di pazuid y banda di panort, keda preserva.

Na e ekipo di trabou di DOW y contratista encarga Odinsa a duna ordo pa tuma solamente e mas minimo espacio necesario pa construccion di e dos caminda nobo. Den un decision strategico pa cu henter e proyecto, e parti aki banda di panort.

Pero diferente na e manera con Gobiernonan rond mundo ta busca pa capitalisa riba un via asina importante, Gabinete Mike Eman a opta pa no ‘verkavel’, kier men, no traha parcela nobo na banda di e proyecto for di Mahuma te Pos Chiquito, pero lage e paisahe di matanan cu bista pa lama y pa e seronan banda di panort.

Den pasado, por ehempel, ora cu a traha e plan pa caminda di Vondellaan y Sasaki, a inclui den dje e parcelanan comercial, cu awendia nos por mira ta varia entre edificionan di oficina, restaurant y centronan comercial. Esaki ta un manera con e estado ta genera un ganashi bek riba e inversion cu a haci pa traha e caminda na prome luga.

“Nos a dicidi cu apesar di e balor cu e area aki por tin, ta bay keda sin desaroya nan pa asina conserva nan berde,” asina Minister President Mike Eman a bisa na medionan di comunicacion dialuna mainta. Apesar cu e vision di su Gobierno for di 2009 ta pa stimula economia pa medio di inversion den renobacion di nos infrastructura y cune e mehoracion di producto Aruba, Premier Eman ta reconoce tambe e balor cu e preservacion di nos atractivo natural tin.

Ta pa e motibo aki, y varios otro cu e proyecto anteriormente conoci pa 40 aña como simplemente 'Vierbaansweg' finalmente ta bay bira un realidad, pero cu e nomber di ‘Green Corridor.’ E nomber aki ta debi cu e trayecto cu finalmente a disidi riba dje tabata e opcion di mas berde. A evita di pasa den cunucu y partinan di parke Arikok, cu tabata loke e otro opcionnan tabata encera.

Expresionnan haci den e articulo aki no necesariamente ta refleha opinion di ArenaPoliti.co