Partido Democracia Real a tene su conferencia di prensa semanal diamars, caminda Andin Bikker a cuestiona e manera di procede di Minister Otmar Oduber tocante libertad di expresion y particularmente libertad di prensa, cu ta fundamental den un Estado di Derecho, manera nos tin na Aruba.

Andin Bikker no a bay den detaye tocante e asunto pasobra awe merdia esaki a wordo trata den parlamento y e tin entendi cu un keho a bay pa Ministerio Publico.

Bikker cu palabra bon cla a splica cu den PDR su concepto libertad di expresion y libertad di prensa ta algo fundamental pa nos democracia. Democracia no ta cada cuater aña so, ora tin eleccion. Democracia tambe ta cu mandatarionan ta na escrutinio di prensa, cu tin un funcion fundamental den un Estado di Derecho, di acuerdo cu su palabranan.

PDR a tuma nota cu Minister Oduber, directo y indirectamente, pa via di manda carta na medionan di comunicacion of canal di television, a eherce presion pa cambia opinion di un of mas periodista pasobra e ta kere cu ta e tin razon.

Bikker a expresa: “Den nos concepto, esaki ta hopi peligroso pa nos libertad di expresion y libertad di prensa, pasobra na final di dia diferencia di opinion ta sano, y como mandatario mester tin lomba hancho y wanta criticanan riba kico ta cuestiona. Pero no por ta asina cu bo ta purba usa bo poder, directo of indirectamente pa influencia opinion”.

Den un estado di derecho tin e libertad pa evalua caso, pero purba influencia e opinion di prensa ta algo cu PDR como partido y como fraccion ta haya inaceptable y condenable.

Esaki NO ta funciona den 2016 den un democracia sano, el a bisa. “Akinan na Aruba nos no tin despota cu ta manda riba nos. Nos tin mandatario cu ta wordo elegi y nombra door di Parlamento, y mester respeta Estado di Derecho, libertad di opinion y libertad di prensa” Parlamentario Andin Bikker a pone acento.

Finalmente, el a bisa cu den e dimension aki e mandatario mester reflexiona riba su manera di anda cu prensa, y en todo caso absorbe un tiki mas e escrutinio di e libertad cu ta wordo eherce a base di libertad di expresion y libertad di prensa.

Expresionnan haci den e articulo aki no necesariamente ta refleha opinion di ArenaPoliti.co