DEN HAAG -- Lider di MEP Evelyn Wever-Croes ta na Hulanda actualmente pa deliberacion cu parlamentarionan y funcionarionan den gobierno riba diferente tema.
Un tema cu tin hopi hende preocupa ta e tema financiero awor cu Banco Central a publica cifranan diferente na Gobierno. E ta trese duda den institutonan di Aruba con porta cu Gobierno ta presenta un deficit di 98 miyon y Banco Central ta registra un deficit di 201 miyon florin. "Lamentablemente nos a pidi Banco Central un reunion 3 siman pasa caba pa haya un splicacion, pero no a haya e cita aki. E no ta bon pa e imagen di Aruba cu gobierno ta usa diferente cifras.
Un otro tema ta e tema di integridad. Nos kier pa gobiernonan di Aruba tene nan mes na reglanan y leynan di integridad. Si en caso cu gobierno di AVP no ta dispuesto pa hasi esey, nos si ta dispuesto pa hasi esey y nos a presenta un plan caba a base di cual Aruba mester yega na cumpli cu reglanan di integridad. Tur e escandalonan cu ta rond di gobierno no ta bon pa imagen di Aruba.
Ta importante pa Hulanda sa cu e pueblo na Aruba no por mas cu tanto medida y tanto abuso y cu ta basta cu tene man riba cabes di Mike Eman y su ministernan" segun lider di MEP Evelyn Wever-Croes.

Lider di MEP a reuni tambe cu presidente di Comision di Asuntonan di Reino sr. Jeroen Recourt na Tweede Kamer. A toca varios tema di interes den Reino y especialmente e preocupacionnan di comunidad di Aruba. Lider di MEP a reuni tambe caba cu minister plenipotenciario na Hulanda sr. Alfonso Boekhoudt riba e bienestar di Arubianonan na Hulanda, especialmente studiantenan.

"Mi ta satisfecho con e reunionnan ta bayendo te awor. Mi ta wordo bon ricibi y ta hayando mas peticion pa reunion. Mi ta spera cu mi por cumpli cu tur prome cu mi bolbe Aruba bek. Mi tin un mision cla mi dilanti: lucha pa bienestar di pueblo di Aruba, no solamente na Aruba, sino na Hulanda tambe" Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co