Minister Otmar Oduber tawata presente den sala di parlamento pa contesta preguntanan cu a wordo haci pa fraccion di AVP durante un ‘’vragenuur’’.  Fraccion di MEP a dirigi 25 pregunta por escrito na Otmar Oduber y nos ta spera cu mes liher cu e la yega parlamento pa atende cu su fraccion e contesta nos preguntanan.

Durante e reuion un biaha mas a keda demostra e falta di transparencia cu tin y tambe e scondemento di informacion cu tin. Na momento cu un miembro di parlamento ta haci un pregunta na minister, segun nos constitucion, e minister mester contesta e pregunta aki. Lamentablemente Otmar Oduber no tin respet pa parlamento pasobra no solamente e ta ganja den sala di parlamento sino e no ta contesta pregunta cu wordo haci den su direccion. Fraccion di MEP a haci Otmar Oduber un pregunta relaciona cu e cantidad di placa cu ta wordo paga door di ATA na e compania di e intimo amigo (ruman) di Otmar Oduber cu ta Damox N.V. Segun e propio minister ATA ta cumpra na ‘’merchandise’’ 28.7% serca e compania Damox N.V. Na momento cu a puntra e minister cuanto esaki ta na placa e no kier a contesta y manera custumber a bira falso, fresco y arrogante. Otmar Oduber mas bien a bira un hende cu no tin caracter, no tin palabra y no tin principio. Na moment obo ta ganja muri, ganja retira y keda toch como minister apesar nada no a cambia y awor ganja hiba un periodista corte su palabranan a manera biento. Nada cu e bisa of menciona no por kere sin mas. Dikon mester tin secrecia pa pueblo? Dikon e no kier bisa of menciona cuanto placa ATA ta paga Damox na momento e cumpra merchandise sercanan??

Otmar Oduber kier pretende y haci comosifuera nada irregular a tuma lugar cu e logo di nos pais. Wak cuanto konkelmento tawata tin cu e compania di Otmar Oduber. Wak kende a gana e bid pa e logo di Aruba. Wak despues diripiente compania ta wordo cambia y ta otro compania ta sera e licentieoverkomst cu ATA. Wak ki dia Damox a wordo inscribi na camara di comercio. Wak e fecha cu ATA a informa comunidad cu Graphix and Beyond a gana e bid pa logo di Aruba.

Graphi-x a wordo cancela na 2009. Pero toch Graphi-x ( cu desde 2009 NO ta exisiti mas) ta gana aanbesteding na 2010, y despues Graphi-x ta pasa pa un otro donjo na 2011, y na 2011 Graphi-x a pasa tur cos pa un compania nobo cu ta Damox NV..di cual donjo ta Ralph Maduro!!!! Tur e companianan aki tin e mesun adres, ta usa e mesun edificio, e mesun computernan, e mesun printer pero segun nan, tur esaki ta legal. ATA ta haci negoshi cu Grpahix and Beyond, Printshop y Damox N.V. y coincidencia of no, tur e companianan aki ta di e intimo amigo di Otmar Oduber y e cosnan aki segun e minister no ta nada stranjo.

Loke nos ta boga pe ta transparencia y na e momentonan aki Otmar Oduber tin hopi mas splicacion pa duna. Na momento cu un minister ta nenga di contesta preguntanan den parlamento y kier sconde informacion pa parlamento ta pasobra e tin miedo parlamento yega na e raiz y pueblo haya sa con Otmar Oduber a usa fondonan publico pa enriquece su amiguito.

Expresionnan haci den e articulo aki no necesariamente ta refleha opinion di ArenaPoliti.co