Pa nos di oposicion sigur e ta un alivio cu trahadornan despues di 4 luna sin entrada lo bai haya algo pa por biba. Den mesun rosea nos ta condena e incapacidad di Minister di Labor sr. Paul Croes como mandatario pa e forma iresponsabel, negligente y cobardia cu e la trata trahadornan di Aura Casino cual nos lo splica tambe. Minister di Labor ta hasi como sifuera ta algo nobo e la inventa y presenta un solucion pa purba di scapa su cara di con e la perde e strea di nord durante negocianan pa e trahadornan.

Realidad curu ta cu Paul Croes tampoco e mediador a logra hinca algo den otro durante 4 luna pa trahadornan di Aura Casino cual ta algo hopi grave y preocupante pa e clase trahador. Nan ultimo recurso tawata pa usa fondo di SVB cual mayoria di biaha ta wordo usa pasobra bo a wordo kita for di trabou of e compania a wordo declara den estado di "faillissement" (segun Cessantia verordening) Den caso di Aura niun di dos scenario specificamente a presenta nan mes cual ta nifica cu no ta Paul Croes como minister a bin cu "e solucion temporario". Sigur e ta di lamenta cu diripiente awor si e ta posibel pa trahadornan di Aura Casino por haya algo di fondo di SVB mientras cu from day one bo por a hasi algo pa impedi e sufrimento di biba sin placa durante 4 luna caba. Nos ta condena enfaticamente e hecho cu Minister Paul Croes, cu tur e tempo ey a huy pa su responsabilidad tur e 4 lunanan sin por a bini cu un solucion, ni e alivio TEMPORAL. Esaki sin duda ta un negligencia contra e clase trahador y demostra un biaha mas e incapacidad di parti Paul Croes! Sinembargo no ta kita afor e credito for di FTA y trahadornan mes cu tur dia a pone preshon.

E solo hecho cu Minister Paul Croes no a realisa publicamente cu den futuro algo asina por bolbe ripiti caminda cu un operador di casino por lanta bela bai sin cumpli cu su responsabilidad cu su trahadornan ta otro prueba cu pa gobierno di AVP nunca e ser humano tawata central solamente nan propio interes politico. Si di berdad e mandatario aki tawata pro-activo e lo a bin dilanti y compromete su mes cu e tin un solucion y presenta un projecto di ley cu lo salvaguardia trahadornan den futuro si un caso similar presenta atrobe cual nos no por descarta pasobra e mesun operador di Aura casino aparentemente ta operando mas casino na Aruba.

Sigur nos di oposicion ta lamenta cu e duracion largo di e negociacionan no a conduci na un solucion definitivo pa 44 mama- y tatanan despues cu nan a biba 4 luna den incertidumbre SALARIO NI ENTRADA! Tambe e ta importante pa remarca cu obviamente nos tin buraco den ley cu ta impedi of forsa operador nobo pa tuma trahadornan di Aura loke nifica cu si nan no kier nos tin 44 persona atrobe cu lo ta desemplea sin un salario den futuro pa mantenenan famia cual lo nifica cu maneho laboral di Paul Croes ta un fracaso! Nos a spera di un politico cu a forsa pa bira Minister hopi mas proactividad di su banda y duna contenido na e slogan e ser humano ta central y no lagando nos hendenan cai abou manera patia berde sin sa con lo bai para cu nan futuro y di nan famia.

Nos di MEP lo keda para banda di e trahadornan di AURA y sosteniendo FTA pa sigi e lucha pa yega na un solucion definitivo y duradero! Den e trayectoria di MEP nos semper a boga pa interes di e trahador y pueblo. Ta pesei mes nos ta sali semper na vanguardia di e clase trahador! Ohala nos por a bisa esei di un gobierno cu a pretende di tin e ser humano central pero lamentablemente a scoge su propio interesnan mientras famianan tawata biba lunanan bou incertidumbre.

Expresionnan haci den e articulo aki no necesariamente ta refleha opinion di ArenaPoliti.co