Glenbert Croes (MEP): Dor di preshon di e propio 44 trahadornan y di MEP a busca un solucion
Nos a tuma nota di e noticia cu mediador a anuncia cu lo tin un solucion temporal pa 44 trahadornan di Aura Casino. Nos ta contento cu despues di hopi preshon di parti partidonan envolvi y di trahadornan finalmente gobierno di aruba y mediador por a pone man na curason pa move un dede pa 44 trahadornan aki cual den comienso nan no kier a hasi. Na e mesun momento cu nos ta contento cu despues di 4 luna nan ta bai haya algo nos ta cuestiona ta dicon a dura asina tanto pa yega na algo temporal. Nos kier pa keda alerta pasbora manera cu e caso a tuma lugar no tin un tipo di prevencion pa evita cu e lo por sosode atrobe.
E solucion lamentablemente ta bini cu mal noticia. Loke tin riba mesa aworaki no ta duna garantia pa trahador wordo tuma na trabou awor cu nan a cabi perde nan trabou. E compania nobo no tin ningun obligacion di tuma e trahadornan y esaki nos ta haya cu e pueblo trahador mester wordo protehi.
Realidad ta cu den ultimo 7 aña e clase trahador a wordo mira door di gobierno como sifuera ta machine, sin balor, sentimento . Nos lo keda alerta pa e trahadornan haya un solucion definitivo pasobra te cu awor gobierno mes no a move un dede. Nos compromiso ta pa keda vigila e proceso di serca pa asina e trahadornan aki por haya nan compensacion.
Expresionnan haci den e articulo aki no necesariamente ta refleha opinion di ArenaPoliti.co