Den rueda di prensa semanal di Partido Democracia Real Andin Bikker a bolbe toca e tema di medio ambiente y e maneho cu gobierno ta hiba, cu segun e parlamentario no ta cuadra. 

E ta haya cu e maneho aki ta incoherente, pasobra PDR a tuma nota cu ultimo simannan Bubali Plas a wordo rosa atrobe despues cu un parti grandi di nos naturaleza pa decadanan y siglos a wordo afecta grandemente. 

E parlamentario a bolbe tuma nota riba kico ta cay of no ta cay bao di ROP y na su opinion netamente ta e gobierno cu durante e mandato di e gobierno di otro signature a critica fuertemente cu nan si tin medio ambiente na pecho anto ta straño cu aworaki un parti grandi di Bubali Plas ta wordo rosa. 

Fuera di esey tin tur e casonan den Corte, y Corte mes a constata cu tin un wild west y cu gobierno no ta reiforza nos leynan of ta reinforza nan caminda nan kere ta bon y e personanan ta haya ta bon pero e incertidumbre aki mester stop.

Mas aleew segun Bikker, el a tuma nota cu tin stagnacion pa loke ta trata bouwvergunning. Bouwvergunning ta un estimulo pa nos economia, pasobra obviamente material di construccion ta wordo cumpra, hipoteca ta wordo cera, Notario ta pasa akte di hipoteca, entre otro. Ora un hende tin un bouwvergunning cu ta keda pega, indirectamente ta stanca e economia.

Bikker a bolbe papia di un locket cu PDR a constata, pa motibo cu tin cierto proyectonan, di cual un a wordo para door di sentencia di Corte y cu dia 30 di December a haya bouwvergunning.

PDR ta puntra su mes con por ta cu si den December tabata tin un nota pa publico cu di tal dia no ta atende publico mas, diripiente e locket ta habri pa e fecha menciona y pa otro hendenan cu no conoce e locket aki y cu no tin cercania cu e minister tin lunanan y hasta añanan cu no ta haya nan permiso pa construccion.

Rosamento na Bubali Plas tambe ta contra un mocion cu a wordo pasa den Parlamento, basicamente pa no bay den e direccion aki, Bikker a expresa, pero asina mes Gobierno a dicidi pa pone un banda, aparentemente, pa otorga tereno y no actua contra rosamento di Bubali Plas. E ta haya cu gobierno ta tene cuenta cu ley di ROP segun e persona cu ta pidi permiso ken si y ken no.

Expresionnan haci den e articulo aki no necesariamente ta refleha opinion di ArenaPoliti.co