AVP no solamente a stroba e Instituto Medico San Nicolas, IMSAN, di bira e hospital tan anhela di pariba di brug durante 7 anja largo, pero  a nenga tambe e pueblo di pariba di brug un cuido medico optimal por completo durante di e 7 anja ey. Y aworaki e partido mayoritario  a haci algo mas peor ainda, manera un ladron den anochi, sin bisa niun hende algo, segun buena fuente, AVP a kita e machinnan pa haci testnan di sanger y urina di landslaboratorium fo’i di IMSAN, asina stobando e departamento di emergencia di IMSAN funciona.

Tur hende cu un tiki tino sa cu un departamento di emergencia no por funciona sin un laboratorium pa check sanger y urina al instante. Bo por imagina bo cu un persona ta hayando un ataque di curazon y cu e no tin un laboratorium presente pa check si su hartemzymnan a subi? Of un persona cu un pancreatitis, etc., ki desaster esey lo ta? Cu un hende ta perde su bida sin cu tin mester, djis pasobra IMSAN no tin e posibilidad pa check e sanger of urina di e patiënt mas?

Wel esaki ta e caso aworaki na IMSAN. Con ta posibel cu e gobierno di AVP por a haci un error asina grandi di kita e machinnan di landslaboratorium cu ta check sanger y urina fo’i di IMSAN? Atrobe e pueblo di pariba di brug ta wordo neglisha por completo door e partido AVP. Nos por corda cu e Directeur di IMSAN himself a bisa publicamente, cu e kier un servicio di laboratorium 24 ora pa dia pa e departamento di emergencia di IMSAN por brinda un servicio optimal na pueblo. Aworaki e partido Berde a haci net lo contrario, e la laga IMSAN sin e posibilidad pa check sanger of urina. Esaki ta algo incomprendibel. E partido na mando ta bisando 7 anja caba cu e lo bai expande IMSAN, pero envez di expande IMSAN e ta cabando cu IMSAN.

E unico cos nos por pensa ta cu probablemente AVP kier privilegia su compinchinan acosto di bida di hende, IMSAN y mas importante cu tur acosto di nos landslaboratorium. Pasobra AVP no por bende pueblo cu nan ta kita e facilidadnan di landslaboratorium fo’i di IMSAN y cu kisas cu e intencion di duna nan na nan compinchi, e la bin cu e construccion of triki pa laga landslaboratorium cai bao di hospital, zogenaamd cu hospital tin e fondonan pa inverti den landslaboratorium pa landslaboratorium hanja e upgrading cu e tabata tin mester di dje desde hopi tempo caba. Posibelmente asina AVP ta purba habri caminda pa su hende por pone su laboratorium toch den IMSAN y kita entradanan grandi fo’i di landslaboratorium. Pa dia landslaboratorium ta atende entre 100 pa 150 persona na IMSAN, cu ta un cantidad substancial di hende cu ta trece hopi placa den caha di landslaboratorium. Y net esey AVP kier kita! Wel Wel.

E partido berde ta lubida por completo cu gobierno y en especial e parti di justicia, mester di landslaboratorium tambe pa por funciona. Por ejemplo ora ta trata di testnan di droga, -autopsia, keuringnan, etc. nan no por ta den mannan priva. Pueblo por wak bon cla awor cu ni bida di hende ta importante pa AVP. Manera ta wordo bisa na Ingles, The only thing that matters for AVP is to comply with their friends and family and nothing else. A bira tempo pa tur hende realisa cu nos no por keda keto mas y laga e partido na mando haci y deshaci cu nos manera e kier pasobra e tin e mayoria den parlamento. Ban spera cu esaki ta un wake-up call pa tur hende.

Miembro di partido politico ABO

Daniel van Heyningen       

Expresionnan haci den e articulo aki no necesariamente ta refleha opinion di ArenaPoliti.co