Cu atencion UPP ta tuma nota di e recien declaracion di Minister Schwengle riba e consensus nobo cu a ser concretisa entre IMSAN, AZV, Minister y Gobierno, pa sigui cu e desaroyo di IMSAN, encamina pa mi persona como minister encarga cu Salubridad, pa duna servicio avansa na e pueblo di Aruba en general y esun di San Nicolas en particular.
Den mesun rosea, pa por hustifica cu toch ta bay continua cu mi vision y mi ideanan, e mandatario ta declara cu si no sigui cu e proyecto anto basicamente lo tin “destruccion di inversion” of “kapitaalvernietiging”.
Cu e declaracion aki Minister Schwengle ta admiti cu gobernacion mester ta un continuidad y cu tambe pa 7 aña largo gabinete Eman I y II a bin ta practica malgobernacion dor di permiti “destruccion di inversion” of “kapitaalvernietiging”.

Cu un cara di "yo no fui” of un “cara di coco” sr. Schwengle ta admiti cu en berdad tin tur ekiponan na nan lugar pa pone esakinan traha.
Pa no perde mucho cara sinembargo, e mandatario di un manera repudiabel ta purba di exonera su antecesor Richard Visser y su mesun persona, expresando cu lo tabata tin algun fout den construccion, y p'esey no a sigui cu e proyecto pa ofrece Aruba y San Nicolas un opcion moderno y eficaz pa atende patientnan.
E berdad semper lo alcansa e mentira, y den e caso aki e minister no por sconde e berdad sunu cu pa simpel capricho politico a boycotea ehecucion di e proyecto aki.
Despues di 7 aña diripiente ta pensa di mester bin cu algun adaptacion pa supuestamente scapa e inversion.
Pero na momento cu a permiti 4 aña di un boycot politico door di Richard Visser, y awor 3 aña di e gobernacion actual, no ta sobra un otro splicacion y veredicto cu minister Schwengle "himself" tambe ta culpabel na e malpractica aki.

Pregunta ta, kiko a induci e gobierno y e mucha manda Schwengle pa reanuda e proyecto??
E contesta e mes un mandatario a brinda nos: continuacion di e desaroyo di ImSan ta importante awor cu tin e posibilidad di reapertura di e refineria.
Pues, NO e cuido medico ta bin na prome lugar, pero cumpli cu probabel exigencianan negocia door di e compania cu lo bay habri e refineria.
Si esey ta e caso, anto at least e pueblo lo por beneficia di e ampliacion y e mehoracion di e cuido, manera mi persona a vislumbra 7 aña atras.

Destruccion di inversion no ta nada straño bou di gabinetenan di Mike Eman.
Un otro ehempel ta esun di dump na Prikibos, unda cu miyones a bay perdi a causa di un minister terco y corupto cu no ta reconoce cu gobernacion ta un continuacion. A prefera di laga e planta bay perdi, perde caso den corte y paga miyones, pa por duna si, of regala un compania compinchi un proyecto pa produci gas y bende cu WEB. Un proyecto by the way, cu ainda no tin claridad y cu a costa WEB miyones.

UPP ta lamenta cu un bunita proyecto manera di ImSAN, cu tabata proyecta y traha como un HOSPITAL, y no como un Centro Medico, a wordo degenera dor di e capricho y infantilismo di ministernan y incapacidad profesional di maneho di e director, dor di a permiti pa 7 aña largo laga e proyecto aki un banda.
E tardansa aki tambe ta bin na remarke pa destruccion di capital of di inversion.

Awor diripiente Minister Schwengle ta mira e importancia pa mas servicio na Pueblo di San Nicolas, y ta papia cu lo haci cambionan y adaptacionnan uzando e ekiponan cu tin caba.
E director actual di ImSAN a declara cu porfin e por a convence e minister pa haci algo cu e infrastructura cu tin den ImSAN.
Caramba,despues di 7 aña! Esta un amor grandi pa e pueblo di Aruba, particularmente pa esun di San Nicolas!!
E servicionan aki lo por trece comodidad pa e habitantenan di pariba di brug, kende lo por corta tempo di viahe y espera uzando e servicionan na San Nicolas mes.
VAYA DESCUBRIMENTO!! Bay ta un minister spierto pa realisa despues di 7 aña e importancia di esaki.
Pero, IMSAN lo NO ta un hospital. Mas bien e ta wordo degrada pa un “daycare” pa operacionnan chikito. Si ta necesario, lo mester manda e patient toch HOH.

Pa hopi aña caba UPP a bin ta denuncia e hecho cu e condicion di ekiponan tabata bayendo atras, hinca ainda den nan cahanan etc.
Awor ta bay uza esakinan.
Mientras cu e OK pa San Nicolas tambe lo bini.
Pero pakico? Acaso cu esun den HOH, specialmente esun cu nan a lubida den e expansion di hospital, lo no ta cla of apto pa acapara tur e actividad di operacion aki na Aruba? Y awor ta resulta cu toch ta necesario pa implementa e plan original, pero cu un kaft berde, pa bende como un otro logro?

UPP ta exigi mas sinceridad di nos mandatario di Salubridad. E mester stop di sigui tuma pueblo haci, y trata atrobe di ta e bon samaritano cu tin e pueblo di pariba di brug na pecho.
No tira culpa tampoco riba si tabata tin mal ehecucion di e construccion, mirando cu aki tambe tabata tin 7 aña (loke mester a sosode den e prome aña caba) cu a pasa prome cu porfin a yega na e conclusion cu mester haci adaptacionnan.

Ta pesey UPP ta exigi di e mandatario of e director di ImSAN pa ta sincero y transparente, y bisa exactamente kiko ta e supuesto fayonan technico cu nan ta papia di dje, y cuanto esaki lo a costa pa drecha nan? Nan ta asina hopi cu e pueblo di Aruba mester a ser priva di un cuido medico avansa, cu a causa bida di varios sernan humano? Ta cuanto hende mas mester muri pa motibo di e actitud di e minister y e gobierno actual?
Otro prueba cu nos Cuido Medico aki na Aruba no ta di 5 strea, pero di 5 cruz!!

E argumento di "kapitaalvernietiging", y alabes cu tin algun fayonan den construccion, ta simplemente pa desvia atencion di e fracaso, incapacidad y mediocridad di tanto minister Schwengle como e director di ImSan, cu por ser cualifica como un "cheap shot"!

"A otro perro con ese hueso!!"


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 22, 2016

Expresionnan haci den e articulo aki no necesariamente ta refleha opinion di ArenaPoliti.co