Nos fraccion tin hopi anjas ta cuestionando e maneho descabeya y sin vision di minister di turismo Otmar Oduber. E minister aki no tawata tin un plan, no tawata tin un vision y mas bien a tuma decisionan AD-HOC y asina perhudicando nos turismo grandemente. ATA a pone su dilanti como meta pa bin cu hotelnan estilo boutique hotels y ta contra di expansion di cantidad di cambernan y di otro banda Otmar Oduber sinta den conseho di minister ta yena nos pais cu mas camber all inclusive di hotel. Esaki ta muestra con e no ta tene cuenta cu ATA pero ta tuma decisionan AD HOC sin pensa riba e consequencianan pa nos pais y nos turismo. For di hopi tempo nos ta bin bisando cu e calidad di turistanan a cai drasticamente. E turistanan cu Otmar Oduber ta treciendo Aruba ta gastando 300 florin menos durante nan estadia. E preocupacion aki nos ta treciendo dilanti y cada vez esaki wordo bisa Otmar Oduber ta desmenti esaki y bisa cu no ta berdad. E cifranan ta papia pa nan mes y e ganjamento y trocemento di berdad di Otmar Oduber no a perdura pa semper. Na e momentonan aki e crisis den nos turismo ta mas bisto cu nunca. E minister di turismo ta nenga di sinta na mesa cu AHATA y mas bien e minister y AHATA ta comunica cu otro via prensa. Nos no ta kere cu esaki ta e mihor manera pa yega na solucionan y atende cu problemanan den nos turismo. Loke si ta remrcabel ta e hecho cu AHATA a confirma loke nos ta bin bisando y di e manera aki ta desenmascara Otmar Oduber su mentiranan.

Mi ta pone textualmente loke AHATA a bisa pasobra NO ta ami a bisa esaki sino AHATA: ‘’minister di turismo y ATA ta presenta un situacion cu no ta cuadra cu realidad’’. Bisando esaki AHATA ta confirma tur e trocemento di berdad di Otmar Oduber y bisa cu nos a wordo enganja tur e temponan aki pa e minister di turismo. Mas aleu AHATA a bisa: ‘’ Tambe adhunto tin un grafico cu ta mustra cu GDP di Aruba den ultimo 10 anjanan a baha. Minister di turismo y ATA ta pretende cu turismo a subi, wel si turismo ta representa 90% di nos economia y ta bayendo asina great, con por ta GDP a cai’’? Bisando esaki AHATA ta reafirma nos preocupacion y ta desenmascara Otmar Oduber su ganajmento. AHATA ta bisa cu si turismo ta asina bon, si turistnan ta gasta placa, dikon e GDP a cai asina drastico?  E GDP ta e gross domestic product y esaki ta ensera tur e entredanan di nos pais. Na momento cu un pais ta depende di 90% di su economia di turismi anto turismo ta crece manera e minister di turismo ta bisa e resulatdo lo mester ta cu e GDP a ta crece y no cai manera cu ta e caso. Ora e GDP ta cai ta pasobra entradanan di pais a cai y economia ta den crisis. Banco Central a relata esaki den su ultimo rapport di anja 2015 y a bisa cu anja 2015 a sera cu 0% economico y esaki ta debi na e caida di entradanan den nos turismo. Kiko Otmar Oduber no ta compronde den esaki mi no sa. Dikon e kier ta terco y no compronde cu tin problemanan serio den nos turismo. Nos ta trece esaki dilanti pa e minister por habri su wowonan y stop di ta terco y cuminsa tuma accionan promer cu ta laat. Nos ta lamenta profudamente cu despues di 7 anja awor Otmar Oduber kier traha un plan pa wak con pa haci pa turistanan gasta placa den nos economia. Si Otmar Oduber kier logra esaki e mester cuminsa prepara un vision, un plan y cuminsa atrae hotelnan di calidad y no hotelnan di 1, 2 of 3 strea!

Expresionnan haci den e articulo aki no necesariamente ta refleha opinion di ArenaPoliti.co