ORANJESTAD – Durante e bishita na Merca, Prome Minister Mike Eman a probecha pa reuni cu e team di Nature Conservancy Program pa Caribe. Presente tabata e director ehecutivo di e programa Luis Solorzano, kende a keda impresiona pa e mandatario cu el a cataloga como un visionario y un lider pa hiba Aruba dilanti.

Despues di un combersacion largo, sr. Solorzano a expresa cu nan ta apoya e ideanan di Prome Minister Mike Eman y ta spera di por traha cune, su Gobierno y e pais dal un paso mas leu den sostenibilidad.

E mision di e programa ta protega, restaura y transforma e forma den cual ta interactua cu naturalesa. E tin di haber cu sostenibilidad y con minimalisa e impactonan negativo cu tin pa mundo. “Pesey nos ta haya cu e vision cu Prome Minister tin pa su pais ta uno visionario, ya cu e kier pa Aruba bira un nacion berde. Pesey nos lo kier traha cu Aruba.”

Loke a hala nan atencion ta e pensamento pa Aruba ta totalmente sostenibel riba tereno di energia, y e proteccion di e ecosistema di e isla ta hopi importante pa sector di turismo y ta algo cu nan por programa cu Gobierno den e area aki. Loke cu e isla a bin ta haciendo, ta pon'e como un ehempel pa demas islanan, no di Caribe solamente pero di mundo.

Pa Prome Minister Mike Eman mes, e encuentro ta uno importante mirando cu e ta un di e institutonan mas grandi di Merca, dedica na preservacion di naturalesa riba tera y den lama. Principalmente pasobra a pone e meta pa Aruba pa ta sostenibel. Pesey a busca contacto cu e organisacion aki via di ex Presidente Bill Clinton, den cuadro di e mision di Aruba pa ta totalmente sostenibel den energia pa 2020. Pero tambe por yega na un cooperacion riba inventarisacion cu por haci di e bida marino y flora, con pa trece mas berde den areanan di ciudad y barionan reenforsando asina e calidad di bida y e ambiente estetico.  

Expresionnan haci den e articulo aki no necesariamente ta refleha opinion di ArenaPoliti.co