E ta birando dimas. Nos Pais ta den gara di criminalidad creciente ya cu tur siman tin e noticia tristo cu tin atraco cu cada ves ta birando mas violento. Nos turismo tambe ta wordo afecta pa esaki ya cu turista ta wordo atraca riba beach, den nan auto y hasta den nan cas di huur. Banda di esaki cada ves mas ilegal ta drenta nos Pais y como cu bo no sa ken ta drenta asina den bo Pais, e sentimento di inseguridad ta crece. Nos Pais lamentablemente ta bayendo fo'i control y den tur esaki e gran ausente ta nos Minister Presidente Eman kende atrobe ta den exterior.

Prome Minister atrobe ausente
Aruba pa basta tempo caba NO tin un Minister Presidente pa atende cu e problemanan di nos Pais. Criminalidad na nos Pais a bay fo'i man, riba tereno social tin hopi problema y preocupacion, nos salubridad publico no ta function optimalmente, pa no papia mes di e desaster financiero. Y den tur e caos aki Pueblo ta spera di mira su Minister Presidente sikiera atende cu e preocupacion nan aki, pero atrobe Prome Minister Eman ta ausente biahando pa haci trabou pa Hulanda.

Aruba mester ta na prome lugar
E no por ta asina cu tin un caos asina grandi na nos Pais y nos propio Prome Minister no ta mustra ningun interes pa atende cu nan. Minister Eman ta puro na biahamento y riba dje no na beneficio di Aruba, pero na beneficio di Reino Hulandes, specialmente Hulanda. Esaki sigur ta un falta di respet pa e Pueblo cu a vota pa e gobierno aki. Pueblo a vota pa Aruba ta na prome lugar, nan NO a vota pa Minister Eman ta di biahe constante pa haci trabou di 'loopjongen' pa Hulanda.

Eman ta loopjongen di Reino
Ta conoci cu Hulanda kier yega na un stul den e Conseho di Seguridad den Nacionnan Uni. Desde 2013 Hulanda ta hibando un campania pisa pa haya e stul aki. Minister Eman ta wordo usa den e campania aki pa papia di su vision (farce) berde pa Aruba y di e manera aki purba convence specialmete e otro paisnan categorisa como Small Island Development States (SIDS) pa nan vota pa Hulanda haya e stul tan codicia den e Conseho di Seguridad di Nacionnan Uni. Si Minister Eman kier ta loopjongen pa Reino ta su asunto, pero e no por bay haci e trabou aki a costo di e bienestar di nos Pais y nos Pueblo. Pasobra banda di e hecho cu ta gasta placa na tur e biahenan aki, Minister Eman NO ta atende debidamente cu e problemanan di nos Pais debi cu e ta den exterior.

Traha pa Hulanda of pa Aruba
E situacion fo’i man na nos Pais merece atencion debido di nos Minister President. Si Minister Eman no kier traha pa Aruba, e ora ta mihor pa Minister Eman tuma su retiro y bay traha full time pa Hulanda. Paso bienestar di nos Pais ta exigi cu nos tin un Minister Presidente pa atende cu Aruba su problemanan y no cu deseonan di Hulanda.

3 mei 2016

Expresionnan haci den e articulo aki no necesariamente ta refleha opinion di ArenaPoliti.co