ORANJESTAD - Despues di a atende dos dia di e ‘Cumbre de Las Americas’ na Panama Prome Minister Hulandes Mark Rutte a regresa Hulanda. Guia di e delegacion di Reino a keda den man di Prome Minister Mike Eman di Aruba. E prome dos dianan hunto Rutte y Eman a atende un cantidad grandi di reunion cu hefenan di estado cu tabata presente na e cumbre mas importante di e region aki. Prome di su salida di Panama Rutte a bisa di ta hopi satisfecho con tur cos a bay. E tabatin palabranan di elogio pa Prome Minister di Aruba pa su bon contacto cu mandatarionan den e area di Caribe y e region Latino-America.

“Algo excepcional sin duda ta cu Panama, Hulanda, Aruba y Corsou tin hopi en comun pa loke ta cultura. Nos ta directo, nos ta enfoca riba haci negoshi, nos ta enfoca riba tuma oportunidadnan cu presenta, nos no ta ‘beat around the bush’ y tur esaki ta brinda extra oportunidadnan pa e periodo cu ta bin”, Rutte a bisa durante un entrevista. Nan tey pa estrecha e lazonan politico y economico y den e siguiente dianan bou guia di Prime Minister Eman, percura pa bin mas empleo na Aruba, Corsou, Sint Maarten y Hulanda tambe. Hulanda ta masha activo caba na Panama, empresanan grandi manera Boskalis ta trahando eynan, Van Oord y hopi mas empresa cu ta envolvi den ampliacion di e canal, envolvi den construccion di islanan, pero Hulanda ta activo tambe na Costa Rica cu proyectonan cu inversion di mas di un biyon dollar. Hulanda ta presente den mas pais den Latino-America.

Rutte: “Mi a papia cu e Presidente di Brazil riba e secura den 4 estado di e pais, mi a papia cu e Minister di Relacionnan di Exterior di Chili di e problemanan cu naturalesa den norte di Chili y ki rol Hulanda por hunga den yuda cu esaki. Como Reino nos por brinda un contribucion unico na e paisnan aki. “

Pa loke ta e reunion encuanto e Canal di Panama Rutte a bisa cu esaki a bay hopi bon. E enfoke ta hopi riba comercio y explora con empresanan di Reino por brinda ayudo y esaki ta crea oportunidad pa mas trabou. Durante e reunion aki e wafnan di Aruba, Corsou y Sint Maarten tabata presente pa discuti riba e pregunta ‘con sigui traha hunto’. Ora e bapornan pasa door di e canal di Panama, e productonan mester wordo distribui. Den e trabou di distribuccion aki e wafnan di e islanan di Reino y Hulanda por brinda nan contribucion. “Den esaki Reino tin realmente algo di añadi’”, Rutte a bisa.

Riba e acuerdo firma cu Panama Rutte a splica cu esaki ta pa fortifica e relacion cu ya Reino tin caba cu Panama. “Pa sigui profundisa comercio, pero tambe e contactonan politico. Loke a resalta ta cu Reino como e unico participante na e cumbre tabata presente cu dos Prome Minister, indicacion cu Reino tin un extra beneficio aki. Esaki ta wordo aprecia y tur hende por mira cu nos kier inverti hunto den e region y esaki ta brinda oportunidadnan politico y comercial.”

Na final di e entrevista Rutte a enfatisa cu Mike Eman cu ne a forma un solo team. Nan a atende tur reunion hunto. Rutte a bisa cu ora nan a puntre kico e como representante di un pais Europeo ta haci eynan el a contesta cu e tambe ta di e region. “Reino ta pa un parti so den Europa y pa un parti grandi den Caribe. ‘Wij horen hier thuis’. (Nos ta pertence aki). Nos a haci e escogencia pa keda hunto den e constelacion aki, pasobra nos ta mira e balor adicional cu ta brinda oportunidadnan pa Reino henter.”

Expresionnan haci den e articulo aki no necesariamente ta refleha opinion di ArenaPoliti.co