ORANJESTAD/PANAMA CITY- Prome Minister di Hulanda, Mark Rutte, a fungi como lider di e delegacion di Reino na e ‘Cumbre de las Americas’ na Panama y na su turno el a invita Prome Minister Eman pa compañe durante e biahe aki. Esaki pa e bon relacion di Eman den e region. Hunto nan a sinta den varios reunion durante e dos dianan cu ta tras di lomba. Reunion di vital importancia pa tanto Aruba como Reino henter. Den un entrevista cortico Rutte a splica con tur cos a cuminsa y a sigui desaroya nan mes. E ta satisfecho con cosnan a bay te awor.

Rutte: “Mi a haya un invitacion di e Presidente di Panama sr. Varela, kende a bisa mi pa bin na e cumbre di e Estadonan Mericano (OAS), pasobra cu Reino ta situa pa un parti chikito den Europa y e otro tres di e cuatro paisnan ta aki den e region. Claro cu mi a accepta e invitacion mesora.”

Riba e pregunta con tur cos a bay Rutte a bisa ‘het is heel goed gegaan’ (cosnan a bay hopi bon), poniendo e accento riba cada palabra. “Loke por mira ta cu durante e prome dia y mey Prome Minister di Aruba Mike Eman y ami mes a hiba hopi combersacion cu lidernan di e region. Presidentenan di entre otro Brazil, Colombia, Cuba, Mexico, Honduras, Bolivia y Costa Rica. E reunionnan aki tabata enfoca tanto riba e desaroyonan politico como tambe e relacionnan economico entre e paosnan aki y e islanan Caribense y Hulanda. Special di e cumbre aki ta cu no solamente Presidente di Merca Obama tabata presente, pero tambe – y esaki ta algo unico – Presidente Castro di Cuba y loke sigur a resalta ta cu e dosnan aki a papia cu otro. “

Rutte a califica e encuentro entre Obama y Castro como uno hopi bon pa e relacion entre Merca y Cuba. “Pero, laga nos no ta ingenuo si, ta bay dura hopi prome cu e relacion aki mehora mas. Pero e prome pasonan ta tuma y esey ta bon pa henter mundo y sigur pa e region aki. Tambe pa e oportunidadnan economico cu por sali di e encuentro aki. Sin duda tambe pa loke ta mehoracion di e derechonan humano na Cuba mes.”

Premier di Hulanda a bisa mas aleu ‘Awe Mike Eman y ami ta trahando duro aki pa gana placa pa Reino. Nos ta haci esaki den trata di crea mas empleo na Aruba, Corsou, Sint Maarten y tambe Hulanda.” Rutte a splica cu Reino ta eynan cu 30 empresa di e sector maritimp cu bou guia di Mike Eman ta participa na un bolsa maritimo masha grandi mes na Panama y siguientemente na Miami. Nan lo splica con bon Reino ta den e soluciona problemanan cu awa, infrastructura y den construi islanan manera esun unda nan ta. “Nos ta para aki literalmente riba un isla y Mike Eman y ami a caba di pone e prome piedra pa construccion di un di dos isla, haciendo Panama City un poco mas grandi. Como Reino nos ta laga atras un recuerdo bibo aki na Panama City.”

Expresionnan haci den e articulo aki no necesariamente ta refleha opinion di ArenaPoliti.co