Evelyn Wever-Croes (MEP): Fraccion di MEP a reuni cu vocero di taxista
PREOCUPACIONNAN DI TAXISTANAN MESTER HAYA PRIORIDAD.
STA CRUZ - Fraccion di MEP a reuni cu vocero di taxistanan sra Shamila Loefstok. Presente na e reunion tabata Dangui Oduber, Guillfred Besaril, Xiomara Ruiz-Maduro y Evelyn Wever-Croes.
Di parti di e taxistanan sra Loefstok a comparti e preocupacionnan principal. Pa MEP e bienestar di taxistanan ta primordial en bista cu e taxista ta e prome cara cu e turista ta mira na Aruba y tambe e ultimo. E prome impresion cu e turista ta haya ta hopi importante y pesey ta den interes general pa scucha e preocupacionnan.
Durante e reunion a toca varios tema, entre otro all-inclusive. Tambe e problematica di taxi pirata, competencia inhusto door di tour-operators, y ahustacion di e lista di tarifa.
"Nos ta aprecia cu e vocero di taxistanan a comparti e preocupacionnan cu nos. Pa nos ta importante pa haya un bista general di turismo y tur esnan cu ta traha den e sector aki. Y especialmente ta importante pa conose e preocupcionnan. Turismo no ta bayendo manera nos kier, e turista cu ta bin Aruba actualmente no ta gasta mes hopi cu antes mas. Turismo ta nos unico pilar economico y ta nos responsabilidad pa atende cu e areanan di preocupcion" segun lider di MEP Evelyn Wever-Croes.
Expresionnan haci den e articulo aki no necesariamente ta refleha opinion di ArenaPoliti.co