ORANJESTAD – Manera por imagina, reapertura di un refineria ta un proceso mas compleho cu djis pasa un switch y bisa hendenan bin traha. Specialmente den un caso caminda e facilidadnan tabata para pa mas di 3 aña, hopi ta loke mester bay inspecciona, drecha, cambia y prepara. Den e acuerdo cu Citgo Petroleum Corporation ta para cu e prome fase, cu lo ta esun di rehabilitacion, ta cuminsa dia 1 di augustus. Esaki ta calcula di tuma entre 18 luna pa 2 aña. No ta descarta cu mientras cu esey ta tuma luga, e di dos fase por cuminsa, asina Minister Ing. de Meza a splica. Den cifra esaki ta nifica cu lo tin mester entre 2.500 pa 3.000 trahado y e produccion por pasa di 125 mil pa 209 mil bari pa dia.

Prome cu augustus, ya CITGO lo ta bezig cu e parti di inspeccion. “Aworaki e target ta cu rehabilitacion mester cuminsa 1 di augustus; eigenlijk prome ya caba tin diferente trabou cu ta bay tuma luga. Pesey nos mester caba cu tur e leynan den Parlamento,” asina Minister Ing. de Meza a splica na prensa. E prome mita di rehabilitacion ta tuma 12 pa 18 luna y e di dos, un otro aña y mey. Un bes cu a yega e capacidad maximo actual di produccion, ainda tin espacio pa expansion ya cu CITGO a expresa su interes pa esaki.

E titular di energia a splica na medionan di comunicacion, cu diferente na un "turn around" manera a yega di experiencia den pasado, esaki ta un rehabilitacion. Esey ta nifica cu no ta baha un planta pa un par di siman pa cosnan wordo drecha. “Aki no, aki bo tin cu bay habri tur cos, kita tur isolacion di pipanan, bay habri tur kolomnan grandi, como tambe e heat exchanges, etc. En fin, ta hopi trabou tin caminda bo tin cu echt  pasa den tur parti di e refineria pa wak su integridad.”

Mester tene cuenta cu ta un planta cu tabata casi 4 aña for di operacion, situa den un area cu un atmosfera hopi agresivo cu chens pa hopi corosion. Tambe mester wak e instrumentacion. Asina mes Minister Ing. de Meza a bisa: “Nos tin hopi trabou y nos kier cuminsa lo mas lihe cu ta posibel.” Di otro banda, bo kier tene cuenta cu tur hende envolvi. E ta un balans entre traha mas duro y keda cla mas lihe, pero e periodo di trabou pa e trahado ta menos largo.

Alvin Koolman, conocido experto den e tereno cu ta forma parti di e delegacion Arubano a profundisa mas den e aspecto aki. “Ora di un turn around bo ta baha e planta pa 6 pa 8 siman, haci tur trabou y cuminsa bek. Dor cu e tabata casi 4 aña sin opera, bo tin cu inspecciona tur y cada liña y te hasta renoba liña; esey ta hopi trabou!" Koolman a bisa cu tipicamente un contratista, pa un trabou asina, no kier traha 40 ora pa siman so paso tin hopi pa tene cuenta cu ne y tambe e inversion ta cuantioso. Ta calcula cu tin rond di 900 trahado Arubiano capacita, pero na su punto maximo di rehabilitacion, ta bay tin mester di 2.500 pa 3.000 hende.

Expresionnan haci den e articulo aki no necesariamente ta refleha opinion di ArenaPoliti.co