Rene Herdé (AVP): Elogio pa escohencianan di gobierno di Aruba
Den e prome di tres dia di debate den Tweede Kamer di Parlamento Hulandes, Aruba y gobierno di Aruba a haya elogio di dos miembro di parlamento Hulandes cu normalmente ta masha critico pa cu Aruba.
BOSMAN
Na comienso di e reunion sr. Andre Bosman a corda e sala cu e dia anterior, dia 6 juni 2016, ta net 72 aña pasa cu e liberacion di Europa a cuminsa riba D-day. Den e lucha pa libera Europa den guera mundial, e refinerianan na Corsow y Aruba a hunga un rol sumamente importante. Sr. Bosman a mustra cu na aña 1941 80% di tur e gasolin pa avion y barconan di e aliadonan, tabata tin di e refinerianan di Aruba y Corsow. Na aña 1944-1945 75% di e gasolin cu aliadonan tabata usa den guera den oriente, tabatabtin di e dos refinerianan na Aruba y Corsou. E contribucion di e dos islanan tabata grandi. Ela gradici e miembronan di parlamento di Aruba y Corsow cu tabata presente pa esaki.
VAN RAAK
Riba pregunta y comentario di e lider di e fraccion di AVP, Rene Herde', e miembro di parlamento Hulandes, sr. Ronald van Raak a duna elogio pa e rol cu Aruba semper ta hunga den trece paisnan di Reino hunto. E rol ey ta uno bunita, pero no facil. Riba e remarca di Rene Herde cu Aruba no a scohe pa independencia, pero a scohe pa usa su derecho di auto-determinacion den un forma diferente y a scohe pa autonomia den Reino, sr. van Raak a contesta esaki: "Mi tin hopi respet pa e escohencianan di Aruba. Aruba tabata na caminda pa independencia. A tuma 10 aña pa esey. Despues di 10 aña pueblo di Aruba a bisa cu e no ta scohe pa independencia. A scohe pa no keda den Antiyas, pero pa sigui un propio rumbo den Reino. Mi kier duna elogio na sr. Rene Herde y na Aruba pa e rol cu nan ta hunga den nos deliberacionnan. Aruba ta mas cla cu tur pais di Reino pa loke ta su vision riba Reino Hulandes y con Reino por traha na beneficio di e cuatro paisnan. Nos ta menciona semper e ehempel di Aruba como hub pa companianan Europeo por yega America. Den esey Aruba ta hunga un rol positivo."
E debate tabata pa trece cambionan den Statuto di Reino pa limita aplicacion di e Algemene Maatregel van RIjksbestuur den futuro. Pero e debate a trata dieferente tema cu awor ta tuma luga den presencia di miembronan di Aruba, Corsow y St. Maarten.
Expresionnan haci den e articulo aki no necesariamente ta refleha opinion di ArenaPoliti.co