Evelyn Wever-Croes den caso di taxistanan 

Lider di MEP Evelyn Wever-Croes a duna di conose cu e ta spera cu minister Otmar Oduber reconsidera su actitud dictatorial. Tin un ley cu ta stipula den ki caso un taxista por pidi pa traspasa un permiso di taxi na un familiar di dje. Esaki por den caso cu e taxista fayese of tin un enfermedad serio di cual un dokter apunta pa e minister declara cu e no por hasi uso mas di su permiso. Mester ta trata di un familiar cu ta usa e permiso pa sigi mantene e famia di e taxista. Den tur e casonan aki a base di ley minister por traspasa e permiso.

Pero awor e minister a publica un decreto ministerial den cual e ta bisa cu e lo rechasa tur peticion pa traspaso. Esaki y mas ingrediente den e decreto ta contra e ley. Mas tristo ta cu e minister sa esey masha bon pero ta impone riba e taxistanan y reta nan pa hibe corte. E minister sa cu e caminda pa Corte ta largo y costoso. "Pesey mi ta haya e actitud dictatorial di e minister hopi lamentable. Ta un abuso pa forsa e taxistanan pa bai Corte pa busca un derecho cu nan tin caba. Mi ta spera cu e taxistanan no permiti esaki y cu nan bringa nan caso te na final. E minister ta abusa di e taxistanan y pesey mi ta bisa e minister cu si tin mester, nos mes ta hiba e minister Corte y nos ta gan'e tur dia den Corte", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co