Aña 2015 ta bay ta un aña cu hopi desaroyo importante pa Aruba su infrastructura, economia y progreso social-economico. Prome Minister Mike Eman, den su discurso di fin di aña, transmiti nacionalmente via radio y television, a duna un recorido di e diferente proyectonan grandi cu ta cuminsa na 2015.

E prome proyecto cu Prome Minister a cuminsa menciona ta uno cu ta bay duna destrictonan priba di brug un coneccion moderno y apropia cu e resto di Aruba. Manera ta conoci na e momentonan aki tin practicamente un caminda cu ta conecta Noord, Oranjestad cu San Nicolas. Green Corridor, ta bay ta un avenida di cuater via pa San Nicolas cu un embeyecemento imprecionante for di areanan di Seroe di Mahuma pa Pos Chiquito, Savaneta, Cura Cabai, Mabon, Brazil, Zeewijk te den Centro di San Nicolas y ta inclui un “fietspad” acopla na Linear Park di Playa te San Nicolas. E enfoke ta bay ta pa haci e areanan rond di e Green Corridor uno cu ta yuda pa un miho calidad di bida pa e ciudadanonan en general.

Un proyecto sumamente importante pa Aruba ta reconstruccion, construccion y modernisacion di e compleho medico na dr. Horacio Oduber Hospital. E proyecto aki ta un di esunnan di mas grandi na Aruba cu Aruba a yega di conoce, specialmente pa e mundo medico. E bay produci un compleho medico completamente renoba y modernisa apropia pa Aruba y pa e generacionnan nos dilanti por goza di un ciudo medico apropia.

Pa hopi aña, waf di Playa a maneha transporte di carga y turista, pero e ultimo añanan, e dos aspectonan aki di mundo di nabegacion a crece asina hopi na Aruba cu e waf no por maneha nan dos, y cada uno ta den caminda di otro. Pesey, Gabinete Mike Eman a cuminsa plannan for di 2009 caba pa desaroya Barcadera den un Waf moderno y cu por maneha fluho di carga rekeri pa Aruba den e decadanan nos dilanti. Esaki ta un proyecto cu hopi gobierno a papia riba dje, pero nunca por a ehecuta. Gabinete Mike Eman I, for di un inicio a pone esaki como un prioridad, mirando cu e tin un efecto grandi riba e desaroyo economico di pais Aruba. Banda di esaki ta bay cuminsa cu renobacion y embeyecemento imprecionante di waf di Crucero na Playa y e area rond di dje.

Den 2015 ta cuminsa tambe cu proyecto di Ringweg cu construccion di un caminda di 4 via rond di centro di ciudad, cu ta bay ta un extencion di Watty Vos Boulevard. Segun Prome Minister cu e proyecto ta inclui fase 3 y 4 di Linear Park di Eagle Beach pa Palm Beach.

Socio-economicamente importante ta e desaroyonan den barionan tambe. Na Noord, Paradera, Santa Cruz, Savaneta y San Nicolas ta bay cuminsa cu construccion di 5 edificio multifuncinal moderno pa mehora servicio publico den bario. E centronan aki ta bira tambe areanan di encuentro pa grandi y chikito. Ta bay tin facildadnan di encuentro, recreo y formacion musical, baile y arte entre otro. 

Na final di aña 2015 caba ta finalisa e proyecto di mas grandi di Solar Park den Caribe. Esaki ta e di dos fase di e Solar Park dilanti di Aeropuerto Reina Beatrix. Otro proyectonan ‘green’ tambe ta uno cu ta esun di mas moderno den Caribe di Waste to Energy (W2E), ta bay cuminsa transforma sushi di dump den energia electrico pa por suministra casnan rond di Aruba. Esencialmente, bahando nos consumo di Heavy Fuel pa traha coriente, pero tambe solucionando e problema di cu nos tin luga mas den dump. Ta bay inicia tambe cu e di dos Parke di Molina y e prome Smart Community den Caribe. E ultimo aki ta un area residencial energeticamente totalmente auto sostenibel.

Un proyecto sumamente bunita y importante ta uno caminda ta bay instala panelnan solar riba dak di tur scol na Aruba. Cu esaki ta cuminsa baha e presion di energia riba e budget di scolnan, pero tambe ta duna e solnan tambe un manera pa keda mantene nan infrastructura optimal.

Segun Prome Minister, “hunto nos lo trece Aruba na 2015/2016 serca di 50% di energia sostenibel; un cifra record den mundo, riba caminda pa 100% na 2020.”

Expresionnan haci den e articulo aki no necesariamente ta refleha opinion di ArenaPoliti.co