Cada dia mas y mas prueba ta bin dilanti cu ta mustra cu Minister Sevinger ta haciendo of facilitando practicanan cu no ta cuadra cu bon gobernacion na nos Pais. Tin hasta veredicto di Huez den cual por lesa con Minister Sevinger ta trapa riba e leynan di nos Pais y ta zaag na e pia di estado di derecho di nos Pais. Ultimo aki mes un netwerk a bira visibil den cual hende serca di e mandatario ta wordo beneficia cu tereno publico pa despues bira haci negoshi na grandi cu e firma di e mandatario. E pruebanan a sali den prensa, nos a expone e pruebanan aki den reunion publico di Parlamento na varios ocacion, nos a hasta puntra ehecutivonan di Ministerio Publico ‘op de man af’ kiko lo wordo haci cu Minister Sevinger, pero te cu awor ningun hende kier bisa si lo somete Minister Sevinger na un investigacion pa locual ta e practicanan cu tereno cu ta duna tur senial di ta coruptivo. Ta parce cu ningun hende kier mishi cu Minister Sevinger pa asina por spaar Minister Eman.

Por tin cosnan mas grave den tapara
Mester remarca cu asina a pasa tambe na Boneiro na aña 2009 unda cu e deputadonan tabata duna tereno na un manera preferencial na nan famia y amigo pa despues esaki nan haci negoshi grandi cu desroyador di proyecto. E tempo ey Hulanda a manda FIOD y Nationale Recherche pa investiga e practicanan coruptico aki cu a resulta di ta un netwerk cu tabata wordo usa pa laba placa, negoshi di placa illegal, traficacion di cocaina y contrabanda di oro. Aki na Aruba tambe un netwerk serca di Minister Sevinger a bira visibel cu ta mandando varios senial manera e caso cu a pasa na Boneiro, pesey ta imposibel cu na Aruba nan ta laga Minister Sevinger sin wordo investiga. Por tin cosnan mas grave den tapara cu ta rekeri investigacion pa despues no resulta cu nos propio mandatarionan a facilita pa criminalnan abusa di nos Pais.

No mishi cu Sevinger pa spaar Eman
E ta simpel. Si no investiga Minister Sevinger ta pasobra cu lo mester spaar Minister Eman. E ta conoci cu Minister Sevinger ta man drechi di Minister Eman y cualkier investigacion cu wordo haci riba Minister Sevinger lo ‘end up’ ta toca Minister Eman tambe. Ta imposibel cu Minister Eman no ta wak e fiesta cu Minister Sevinger ta haciendo cu tereno, pa no papia mes di e fiesta cu permiso. Ta solamente esnan cu kier pa Minister Eman keda na poder y no wordo atacha, lo keda sin investiga Minister Sevinger.

20 september 2016

Expresionnan haci den e articulo aki no necesariamente ta refleha opinion di ArenaPoliti.co