Cu gran atencion PPA por a tuma nota di expressionan di preucupacion di un parlamentario den oposicion pa e forma cu parlamento ta worde trata pa cu e tempo etc cu ta worde duna pa studia e documentacion  relaciona cu tratamento di e Ley pa pasa e projecto di CITGO.  Gobierno ta desea un procedura cu no ta normal y no ta duna e seriedad na e forma cu un projecto/ley asina normalmente mester worde duna. Tur cos ta indica cu gobierno a scoge e procedura pa duna un ‘show politico’ cu otro palabra campanja electora a cuminsa cu AVP cu tratamento di e projecto di CITGO!!  No kabe duda cu MEP ta sinti e falta di seriedad y e atrapamento di nan derecho/deber di oposicion door di gabinete Mike Eman.

Na e otro banda …ora un oposicion  hiba un maneho politico pa hasi como sifuera cu e projecto di CITGO ta nan logro….anto naturalmente gobierno ta sali for di e punto di salidad…..si ta di boso anto boso no lo tin mucho pa studia !! E posicion aki cu tin como meta saca ‘juice politico’  ta trece cunele si….cu como oposicion den parlamento bo posicion ta basta ‘zwak’ mes. Con bo por opone y controla algo …cu bo a informa pueblo cu ta boso logro ?? Y AVP su gobierno di nan banda ta abusando di e saber aki cual ta hasi e rol di oposicion MEP/DEM REAL  masha zwak mes.  En realidad e ta ensera cu oposicon por realisa den su control cu varios aspecto di e totalidad NO ta bon….pero E saber di parti di gobierno cu e oposicion di MEP/Dem Real mester vota pa e projecto di CITGO….ta pone cu gab Mike Eman lo hasi y deshasi cu nan.

Gab Mike Eman den esaki representa pa Min Mike de Meza alias THE MESS  a anuncia fecha diabierna 13 di mei 2016 cu nan a jega na un acuerdo cu CITGO/PDVSA y cu e documentacion lo worde manda pa Staten dentro di DOS siman.  Mientras tanto 4 luna a saca y e documentacion NO a worde manda pa Staten. Segun PPA por comprende awor numa tin un cantidad di documento poni ‘ter inzake’ den bibliotheca di Staten. Ningun hende por garantisa cu nan ta 2000 documento esta e parti di CITGO anto riba djele lo mester bin e parti di VALERO cu pueblo no a worde informa cuanto pagina e documentacion aki ta ??

Un procedura hiba pa lunas ….unda un cantidad di professional tabata envolvi….hasta uno cu a distancia su mes cu e declaracion cu ningun hende NO ta hunga cu su integridad …..pa no lubida cu ‘persona di contacto’ venezolano cu hasta MERCA a sera….!! Con por ta posibel cu un gobierno cu lo mester duna respet na parlamento e instancia di mas halto di pais Aruba ……por dicidi di trata un parlamento y muy especial oposicion na e forma aki.  Anto e mesun oposicion cu a ‘scapa’  gobierno di cai  diahuebs ‘pretu’ fecha 8 di September 2016….. awor  ta lomba contra muraya…… Gab Eman lo  ‘bulldoze’ e projecto aki …pasobra simpelmente oposicion MEP y Dem Real a anuncia cu ta gracias na nan y nan lo vota PRO sin cu nunca nan a ricibi un pagina mes di locual gobierno di AVP a negocia.

PPA ta di opinion cu esaki ta un proceso hopi tristo…..tristo pasobra pais Aruba tin un gobierno abusador…y na mes momento un oposion ‘zwak’ cu a bende su posicion delanta kaba.

PPA  hibando oposicion di pafor di parlamento ta e ‘unico’ partido politico cu e cuestiona ….ki sorto di ‘deal’ gobierno a sera cu CITGO ARUBA (CITGO Corporation) den nan declaracion fecha 11 di juni 2016 a declara enfaticamente cu esun cu a sera un acuerdo cu Aruba …no ta nan pero CITGO Aruba un compania riba papel te na e momento aki !!. PPA a cuestiona e hecho cu gobierno a dicidi di accepta pa Aruba su refineria worde transforma den un ‘upgrader’ en vez di keda funciona como un refineria ??  Esaki segun e mesun declaracion di CITGO Corporacion fecha 11 di juni 2016. Te na e momento aki no ta cla kende ta pone e suma di  600 million dollar pa e transformacion aki ??

Comparacion cu Corsow:

Si compara e informe aki cu locual a sali den prensa di e refineria na Corsow  tur esnan serio mester pensa bon un rato.  Corsow a firma un acuerdo cu lo inverti  10 billion di dollar (18 billion/miljard florin_) den nan refineria …..Cu otro palabra Corsow a scoge pa mantene nan ‘refineria’ y inverti den djele !!. Aruba a scoge pa inverti den un ‘upgrader’ cu  eigenlijk ta un ‘downgrading’ di nos fascilidad !! Anto e suma di inversion ta apenas  entre 450 pa 600 million dollar cual riba su mes ta leeuw di ta hopi…e ta un 1.1. billion di florin cual ta  1/18 parti di e suma cu lo worde inverti den refineria di Corsow.

Si….aki na Aruba gobierno ta organisa fiesta tras di fiesta pa e suma chikito aki pa ‘transforma den un upgrader’ ….anto ta cuanto fiesta gobierno di Corsow lo mester organisa pa e inversion di 10 billion di dollar (18 billion/miljard florin) ??

PPA ta informa nos pueblo …habri boso wowonan….apertura di un ‘upgrader’ lo por trece hopi otro consecuencia pa nos sociedad.

PPA lo sigui e tratamento aki di acerca y lo cuestiona tanto gobierno como parlamento y si mester fraccionan individual riba nan ‘rol’ den esaki. PPA lo tene TUR partido politico responsabel den futuro pa nan rol den esaki encaso e tin consecuencia ‘dramatico’ pa nos sociedad.


Aruba, 20 di September 2016                                        Lider Politico di PPA

                                                                                           BENNY NISBET

Expresionnan haci den e articulo aki no necesariamente ta refleha opinion di ArenaPoliti.co