"Enbez di ta discuti over di documentonan cu kier hiba cas, lo ta miho pa miembronan di Parlamento busca y presenta ideanan pa henter nos pais saca e maximo probecho di e re-apertura di e refineria." Rene Herde', lider di e fraccion di AVP a cuminsa e reuda di prensa di e fraccion di AVP cu e palabranan aki. Cu esey ela manda un mensahe masha cla pa tur miembro di e fraccionnan di oposicion cu a cuminsa cu un discucion si nan por haya copia di e documentonan pa hiba cas. Den diferente declaracion e fracicon di AVP ya a splica, cu nan ta haya cu semper, den tur situacion, Parlamento mester haya tur informacion y tur documento. Parlamento mester tin tur informacion na su disposicion pa e por tuma desicionnan responsabel y bon informa. Pero esey no kier men cu e miembronan di Parlamento mester haya copia di e documentonan pa nan hiba cas. Den e forma cu Presidente di Parlamento a regla pa tur miembro di Parlamento haya tur informaicon over di e ley y e contractnan pa habri e refineria, ta cumpli cu e exigencia cu miembronan di Parlamento mester semper haya tur informacion.

PROBECHO MAXIMO
Den e situacion di mercado internacional di petroleo, cu e competencia feroz y e mercadonan nobo, cu un prijs di petroleo crudo masha masha abou y cu fuentenan nobo di petroleo, ta remarcabel cu ta dicidi di inverti asina hopi placa pa reactiva un refineria cu tin algun aña sera. E suerte ey a toca nos na Aruba. E suerte ey ta danki na un gobierno cu no a stop di busca posibilidadnan pa habri e refineria. A busca inversionistanan rond di mundo y a yega na e compania CITGO di Houston, Texas na Merca. Awor cu e refineria por bay habri atrobe, nos na Aruba mester haci tur cos pa saca e probecho maximo pa nos pais. Rene Herde': "E re-apertura ta nifica un diversificacion di nos economia, pero tambe e ta duna nos tempo pa sigui traha riba pilarnan nobo di economia cu nos a cuminsa haci algun aña pasa. E refineria ta bay crea actividad economico nobo pa nos pais, pero e ta tambe un oportunidad pa usa e oportunidad aki pa crea actividadnan economico nobo, cu lo dura mas largo cu e 15 pa 25 aña di e contract cu CITGO. Specialmente den e area di San Nicolas. E efecto di e refineria riba nos mercado laboral lo ta grandi. Pero e ta tambe un oportunidad pa baha e desempleo mas abou ainda y crea gruponan grandi di trahado cu conocemento y experiencia cu por wordo exporta pa paisnan den nos region cu no tin e experticio ey." Asina Rene Herde' a duna diferente ehempel di actividadnan nobo cu nos por crea rond di e refineria. Ela haci un yamada na henter comunidad, specialmente hobennan, pa usa nan creatividad y crea oportunidadnan nobo pa futuro cu e re-apertura di e refineria.

Expresionnan haci den e articulo aki no necesariamente ta refleha opinion di ArenaPoliti.co