ORANJESTAD - Explotacion di e refineria door di CITGO Petroleum Corporation ta mucho mas faborabel pa pais Aruba cu tempo Valero tabata doño di e instalacionnan. No solamente mas faborabel financieramente, pero tambe riba tereno di medio ambiente e asuntonan ta miho regla cu den tempo di Valero. Riba dje gobierno ta bira doño di e refineria y di e forma aki por tin un miho maneho.

Awor cu pais Aruba pa prome bes den 92 aña ta bira doño di e instalacionnan, e por maneha miho loke ta pasa den y rond di e refineria. Asina e deal ta encera un cantidad grandi di condicion cu no solamente ta hisa e entrada di caha di gobierno, pero cu ta percura pa un miho proteccion di medio ambiente. Financieramente e acuerdo cu CITGO ta mucho mas miho a base anual pa Aruba cu tempo Valero tabata doño di e instalacionnan. Banda di e suma di 18 miyon florin pa aña na huur den e prome cuatro añanan - despues e suma aki ta bira 33 miyon pa aña - gobierno ta haya un minimo di 18 miyon florin pa aña na winstbelasting, pero e suma aki por hasta bira mas cu esaki. Cu lantamento di e compania estatal Refineria di Aruba (RDA) pais Aruba finalmente ta bira doño di un refineria modernisa, di un terminal di petroleo y un netwerk di distribucion di petroleo. Si ta asina cu RDA mester entrega un garantia cu si Aruba kier stop e acuerdo di lease, CITGO mester haya bek su inversionnan kitando afo loke el a schrijf af caba.

E contract cu CITGO ta un aderlanto grandi riba tereno di medio ambiente. Manera ta conoci Valero tabatin solamente e obligacion pa deshaci di e refineria y nan responsabilidad tabata limita na e suma di placa acorda den e Environmental Trust Funds di 1989. Den e acuerdo cu CITGO awor tin poni formalmente exigencianan moderno cu si no cumpli cu nan tin sancionnan. Asina e instalacion ta bay draai riba gas. Emision di CO2 mas tanto posibel ta wordo recogi den un instalacion cu ta haci uzo di e CO2 aki cu ta bay wordo uza pa cultiva algen. E cultivo di algen aki ta wordo usa den fabricacion di entre otro medicina.

Expresionnan haci den e articulo aki no necesariamente ta refleha opinion di ArenaPoliti.co