Apertura di refineria na San Nicolas ta prome di October. 

ORANJESTAD – E ley cu ta autorisa acuerdonan cu Valero Energy Corporation y CITGO Petroleum Corporation ta rumbo pa Parlamento di Aruba. “Despues di a ricibi conseho sumamente positivo di Raad van Advies, Gobierno a traha diligentemente pa incorpora consehonan di e organo constitucional mas lihe cu ta posibel,” minister Mike de Meza a declara. Reapertura di e refineria ta nifica un impulso grandi pa desaroyo economico di nos isla, primordialmente pa e area p’ariba di brug y specialmente San Nicolas cu ta bay conoce un empuhe di actividadnan comercial atrobe. E ley, como tambe e acuerdo nan entre Gobierno di Aruba cu CITGO y cu Valero mester drenta na vigor prome di october 2016.

E reapertura ta brinda hopi oportunidad pa empresanan cu semper a brinda servicio na e refineria, como tambe na personanan cu semper a labora den e industria aki. “No mester lubida e decenas di Arubiano trahando den exterior cu lo haya oportunidad pa regresa nan pais,” e mandatario a declara. Reapertura di e refineria lo nifica un impulso economico grandi, como tambe un fortificacion di e maneho monetario, empleo, finanzas publico, como tambe uzo di tecnologianan limpi.

E ley ta autorisa Gobierno di Aruba pa drenta den acuerdonan cu CITGO pa lease e instalacionan pa un periodo di 15 aña cu un posibel extension di 10 aña mas, como tambe pa cera un acuerdo unda cu Valero lo termina su operacionnan definitivamente y ta traspasa e instalacionnan, terenonan y demas propiedad na Pais Aruba. E ley ta autorisa Gobierno di Aruba tambe pa establece un compania estatal, Refineria di Aruba (RDA) N.V., cu tin e control exclusivo di e terenonan den erfpacht y e instalacionnan. Temporariamente RDA lo fungi tambe como e accionista unico di e compania cu ta suministra e mercado local. Na 2010 Gobierno di Aruba a introduci un regimen fiscal specialmente pa refineria y terminalnan petrolero. E regimen aki ta obliga refinerianan pa paga un minimo di $10 miyon anualmente na winstbelasting. “E regimen fiscal aki ta keda vigente y aplicable pa CITGO,” minister de Meza a indica.

E ley aki ta resultado concreto di e empeñonan cu Gobierno di Aruba a hiba for di algun aña caba. Ademas reapertura di e refineria ta contribui na diversificacion di nos economia cu ta central den e maneho economico di Gabinete Mike Eman II. “E hecho cu tur departamento di Gobierno ta duna e ley aki prioridad, como tambe institutonan constitucional, ta ilustra e importancia di e ley aki pa nos pais,” Minister Mike de Meza a sigui declara. Ta premira cu tratamento di e ley den Comision Central di Parlamento, como tambe e reunion publico unda cu ta debati riba e proyecto di ley lo sosode den e simannan nos dilanti pa asina tur cos ta cla pa dia prome di october 2016.

Expresionnan haci den e articulo aki no necesariamente ta refleha opinion di ArenaPoliti.co