Despues di e reunion maratonico riba Ley di CITGO e homber humilde, e motor tras di reapertura di e refineria tabata orguyoso, emocional y satisfecho. 

ORANJESTAD - Despues di e reunion intensivo den Parlamento di Aruba riba e ley di CITGO unda pa dos dia largo a debati, delibera, discuti te den oranan laat di anochi, pa na final e ley a pasa cu 19 vota na fabor, un contra y un miembro ausente, a bin un tsunami di reaccionnan positivo. E explosion di alegria riba tribuna tabata enorme. Esnan cu a sigui e reunion riba tribuna tabata masha contento cu e decision tuma y algun no por a contene nan lagrimanan na momento cu e himno di Aruba a wordo toca. Tur a canta den voz halto, mientras Parlamentarionan di partido AVP a wanta e bandera di Aruba den nan man, demostrando asina cu e logro aki ta di Aruba y no di un partido politico.

Un homber cansa, pero sumamente orguyoso y satisfecho tabata sin duda e Minister di Energia Mike de Meza. E sonrisa riba su cara tabata grandi. E ta merecedo absoluto di e atencion positivo cu tabata bin di tur banda den su direccion. El a persevera, a bringa contratiempo, a para duro ora tabata mester, a keda kera den e soño ora otronan a give up y awe e coronacion di e logro ta di e persona humilde aki. Di biaha despues di votacion, Minister de Meza den un entrevista a bisa "Pabien Auba. Pabien San Nicolas." El a splica cu awor cu e leynan a pasa e acuerdonan firma cu Valero y CITGO ta bay en efecto. "Nos tin un operador nobo y un doño nobo di e refineria y e doño aki ta pais Aruba. Despues di 92 aña Aruba ta bira doño di e refineria. Nos ta aki representando pueblo di Aruba, asina ta cu e refineria ta di e pueblo aki."

De Meza: "Mi ta hopi orguyoso di ta parti di e gobierno aki. Orguyoso di e sosten na prome lugar di e fraccion di AVP cu semper a sostene reapertura di e refineria. Mi ta bisa danki na Valero y yama bon bini na CITGO y gradici nan pa bira nos partner nobo." De Meza a splica cu prome di october ta bira e 'effective date'. Esey ta e fecha oficial cu Aruba ta bira doño di e refineria, e dia oficial cu e refineria tin un operador nobo, e dia cu RDA ta drenta den funcion y ta e dia oficial cu e operador anterior ta stop cu su actividadnan. "Mi ta para aki toch cu sentimentonan mixto, pasobra cu e operadornan anterior semper nos tabatin un bon relacion. Nan a haci hopi pa Aruba, pero esun nobo tambe a priminti di lo haci hopi pa Aruba." De Meza a recorda con semper nos grandinan tabata anhela pa un dia e refineria ta di Aruba mes y esaki a keda logra durante gobernacion di Gabinete Mike Eman II. "Asina nos a cumpli cu e deseo di nos grandinan."

Expresionnan haci den e articulo aki no necesariamente ta refleha opinion di ArenaPoliti.co