Ministernan Eman y de Meza tabata hopi bruha den Parlamento. 

Diamars Parlamento a sigui trata e ley di Citgo. Lider di MEP, sra Evelyn Wever-Croes a duna di conoce cu den prome ronde di e contesta di Gobierno, partido MEP a haya un sin fin di atake contra nan.
“Pesey mi a ripiti e palabranan masha bon scohi di sra Michelle Obama: “When they go low we go high”.

Sra Evelyn Wever-Croes ta bisa cu Minister President Eman tabata poco bruha y debil. “Ta obvio cu den su curason e no ta felis awe, pasobra e sa cu reapertura di refineria ta ridiculise, no solamente na Aruba. Pero mundialmente. Pasobra ela biaha mundo rond, gasta miyones di placa di pueblo, hincando nos pueblo den un MEGA DEBE pa bende un vision GREEN, cu awe e mes ta bai pisotia. Manera colega Chris Romero, experto riba e tereno aki, a mustra: no ta existi un refineria GREEN”.

Sra Wever-Croes ta enfatisa cu Minister Mike de Mesa a bay mas "low", a hinca su famia aden y tabata mustra rabia, hasta frustra.
“Ta straño, pasobra e si mi a kere cu e tabata mas contento cu e re-apertura. Mi ta kere di berdad cu Minister de Meza nunca a perde speransa di re-apertura di e refineria. Pero lamentablemente, e mester a bai hopi low atrobe y hasta a hinca mi famia aden siendo cu ningun hende a hinca su famia aden. Mi tambe por bai “low” pero mi ta scohe pa NO hasie”.

“E Ministernan a bisa tambe cu ami ta negativo.
Acaso ta pasobra mi a cuestiona e deal, mi ta negativo? Pasobra mi ta hasi mi trabou pa controla y cuestiona Gobierno mi ta negativo?”.

Sra Wever-Croes ta bisa cu ta importante pa Ministernan di AVP compronde cu e pueblo aki no ta confia AVP mas. Compronde cu ora ta trata famia Eman y garantianan, tur hende ta tene nan curason y nan cartera pasobra awe ainda nos ta pagando garantianan di Henny Eman.

Y nos tin pa paga te maart 2018. Ta danki na sr Nelson Oduber y sr Nilo Swaen ela renegocia e garantia pa bahe di $206 te na $110 miyon pa soluciona e problema serio aki pa Aruba. Pesey compronde cu ora pueblo scucha Eman y garantia, tur hende ta bai den panico, pasobra awor nos pais ta den bancarota, ta con nos yiunan ta bai paga e garantia ey.
“Pesey mi a propone Gobierno pa sera un seguro contra e claim aki. E ta caro berdad, pero por lo menos e trese poco trankilidad.
Loke SI ta negativo ta cu AVP a bai CONTRA reapertura di Coastal na 1990 y mira cuanto bienestar Coastal y sr Oscar Wyatt a trese pa Aruba.
Nos no por hasi manera cos cu no tin preocupacion. Mi tin preocupacion pa e riesgonan den e deal”, Lider di MEP ta bisa.

“Pesey ta importante pa pueblo di Aruba sa cu nos fraccion lo tuma un decision na bienestar di Aruba, na bienestar di e centenares di mama y tatanan cu lo bay haya trabou. Pasobra nos ta na fabor di e refineria, nos ta na fabor di San Nicolas, pero mi ta contra e falta di transparencia den e deal aki.
Y e prome cos cu bay malo, nos lo tene Mike Eman y Mike de Meza personalmente responsabel pa esaki", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co