Minister de Meza den Parlamento. 

ORANJESTAD – Minister di Asuntonan di Energia Mike de Meza a bay profundamente den su splicacion riba e proceso pa yega na un acuerdo cu CITGO, pero tambe contenido di e contracto aki compara cu esnan di pasado, y alabes a contesta pregunta cu Parlamentarionan a haci na dje.

Den e parti inicial di su disertacion Minister de Meza a bisa cu ta parce cu fraccion di MEP no ta compronde henter e proceso cu a sigui pa sigura cupo di trabou pa localnan y tampoco ta compronde nan criticanan sin presenta solucion pa bisa cu na final lo vota pro e ley di e refineria toch. “Critica, critica, no ta yuda nos pais na nada. Si bo ta critica constructivo ta bon, pasobra bo ta bin cu alternativanan pa yuda Goberna. Ora mi scucha e lider di fraccion di MEP ta cu acusacionnan di hendenan cu a bay ‘wine & dine’ ora di bay Merca, mi tin cu bisa cu nan no por ta serio. Mas ainda ora cu esaki ta tuma luga den un reunion historico.”

Tambe e mandatario a papia di e hilaridad cu lider di fraccion di MEP ta causa. El a bisa cu e politico di oposicion ta papia di e hecho cu nan no a haya documentonan di e negociacion y acuerdo pa mira, cual ta algo cu no ta berdad. E documentonan di e diferente acuerdonan pa reapertura di e refineria tabata pa 9 dia largo den Biblioteca di Parlamento, unda nan tabatin acceso pa 24 ora pa dia na esaki y tur parlamentario por a bin cu consehero si nan tabata desea. “Pero mi a mira  sra. Wever-Croes a keda solamente 5 minuut den e Biblioteca y sin ningun consehero. Con serio nan ta? Minister Mike de Meza a puntra den Parlamento. Y a agrega cu hasta si tabatin pregunta, e expertonan tabata disponibel pa contesta. “Si bo ta keda solamente 5 minuut eyden, con serio bo por ta. Si bo lider mes no ta tuma su trabou necesario, si bo lider mes no ta para pa reapertura di e refineria, bo sa cuant’or tin. Hopi ta bin aki den haci fanfaria, pero pueblo ta mira e cosnan aki.”

El a sigui bisa “bo por tin bo criticanan y preocupacion si bo ta sincero. Pero loke cu nos tin riba papel nunca a wordo logra, cuminsando for di tempo d Lago te awor. Awe ta papia di standardnan di medio ambiente y salud, cual ta wordo controla y evalua door di DTI. Pa 99% ta kita varios gasnan peligroso. Cosnan cu tabata dañino pa lama den e acuerdo aki a wordo elimina 100%. Ainda falta e ley di Medio Ambiente cu ta na caminda. Pues tin un diferencia di dia y anochi entre loke a logra den pasado y awo. Antes no por a drenta e refineria pa controla cu e operador ta cumpli cu e exigencianan. Awor si e lo bay tuma luga. Ora bo ta papia di e parti di medio ambiente, e Gobierno aki a tum’e hopi na serio. Ehempel ta e uzo di Algen, cu CITGO y varios partnernan di rond di mundo lo participa den esaki,” Minister de Meza a bisa, papiando cu hopi orguyo loke e team di expertonan local a logra den negociacion cu gigantenan den mundo petrolero.

Expresionnan haci den e articulo aki no necesariamente ta refleha opinion di ArenaPoliti.co