Traspaso di Valero pa Aruba ta cla mescos cu acuerdo cu CITGO. 

Oranjestad – Diaranson a firma e traspaso di propiedad di Valero pa gobierno di Aruba cu na su turno ta lease e cu CITGO. E proposicion di ley a bay Parlamento pa wordo trata. Di e forma aki reapertura definitivo di e refineria ta yega mas cerca. Contrario na tempo di reapertura door di Coastal, e biaha aki e acuerdonan cu mester a wordo cera tabata mas complica. Esaki a tuma su tempo, pero e final ta tras di porta.

E proceso di traspaso di refineria di Valero tabata compleho. Tempo cu Coastal a tuma over e refineria tabata un ‘as is where is’ y e transaccion tabata simpel. Awor e situacion ta otro pasobra cu e refineria ta bira propiedad di gobierno y ta bay over den un NV gubernamental nobo, ‘Refineria di Aruba NV’ (RdA). Pa por lanta RdA gobierno mester aprobacion di Parlamento. Ora esaki ta cla, RDA ta verhuur e refineria na CITGO. Sinembargo, pasobra cu CITGO ta huur e refineria y no ta bira doño cu ta trece cu ne cu ora e contract di huur termina mester laga tur cos den su estado orginal, mester tin un bon entendimento entre pais Aruba, CITGO y Valero di tur loke tin na propiedad. Pa motibo cu Valero a para tur su actividadnan na Aruba e mester a cumpli cu su obligacionnan manera belasting y e fondo di medio ambiente. Esaki ta e motibonan cu e negociacionnan a tarda mas cu a pensa, pero nan a keda cla y den forma satisfactorio pa tur envolvi.

Awor cu e acuerdo cu Valero a keda firma y e negociacionnan entre pais Aruba y CITGO a keda cla, e proposicion di ley a bay Parlamento via Raad van Advies. Manera ta indica, reapertura oficial di e refineria ta tuma luga na fin di e luna aki.

Expresionnan haci den e articulo aki no necesariamente ta refleha opinion di ArenaPoliti.co