“E berdad semper ta alcansa e mentira. Nos a haya e contractnan di CITGO y di Valero. Esakinan ta e contractnan cu Gobierno a nenga nos di haya. Y awor aki nos tin e contractnan den nos man.

Mi no ta bay divulga ainda con nos a haya e contractnan aki. Pero nos tin nan den nos man y nos lo bay studia nan den fin di siman hunto cu tur nos conseheronan, pa dialuna ora di trata e reunion den Parlamento tocante CITGO y e reapertura di e refineria.

Pa loke mi por a mira for di awor caba, mester bisa cu no tin practicamente nada confidencial den nan. Esaki kiermeen cu Gobierno no tabatin ningun motibo pa nenga nos e informacion aki.
Esaki kiermeen tambe cu Mike Eman, Mike de Meza y Mervin Wyatt Ras ta skibi e pagina di mas scur di e historia di democracia di nos pais.
Mervin Wyatt Ras ta bay bira mama di e pagina mas scur den historia di Parlamento di nos pais door di nenga nos como Parlamentario documentonan pa nos por aproba un ley, sabiendo cu e no tabata tin ningun motibo hustifica pa nenga nan na Parlamento.

Sra Wyatt Ras mes por a lesa den e documentonan na unda den cada contract ta para bon cla ki ora partidonan por duna otronan e informacion cu tin den e contract.

Den e contract di Valero den seccion 13.3 ta regla e confidencialidad entre Gobierno y Valero na unda Valero ta duna autorisacion na Gobierno pa entrega e informacion na algun instancia, entre otro Parlamento di Aruba, Raad van Advies di Aruba, Algemene Rekenkamer di Aruba, Departamento di Belasting di Aruba y Banco Central di Aruba.

Esaki ta prueba un biaha mas con maligno e pensamento di AVP ta y con hopi Presidente di Parlamento sra Wyatt Ras a faya. E no a faya MEP, sino democracia na Aruba y e pueblo di Aruba, di haya sa kico realmente tin scondi den e contractnan aki.

Desde cu e documentonan aki a cay den nos man, nos ta studiando nan. Y mi tin pa bisa cu mi tin sentimentonan hopi mixto pa loke ta trata henter e deal aki. Di un banda mi tambe kier mira nos economia draai bek y mi kier mira San Nicolas haya bida bek. Pero mi ta puntra mi mes, kiko ta e prijs cu nos ta bai paga riba termino largo. Na final di dia mi mester bisa si cu den e crisis financiero y economico cu gabinete Mike Eman tin nos aden, esaki toch ta trese poco alivio" Evelyn Wever-Croes ta termina ta bisa.

Expresionnan haci den e articulo aki no necesariamente ta refleha opinion di ArenaPoliti.co